朱茵做硬Paul嫂

朱茵和黃貫中（Paul）雖然未結婚，但Paul的Fans已視她為黃太，暱稱她為「阿嫂」；愛得坦白的朱茵承認和男友早有結婚大計，問到是否已收男友的戒指，不說謊的她沒有否認：「唔講你知！」

朱茵和Paul拍拖11年，依然愛得癡纏，她大讚男友鐵漢柔情，每年生日及情人節必定會送上她最愛的紅玫塊：「有次佢出咗埠陪唔到我，竟然託朋友送花畀我！（有冇收過戒指？）唔講你知。」早前Paul表示沒有計劃和她結婚，她卻踢爆男友：「佢梗係咁講啦！其實我哋有結婚計劃，不過唔會短期內，因為我同佢都好忙。」又指他日結婚必定會公開，而最理想的婚禮場地是在外國充滿陽光的地方。

歌迷認定黃太

問她可曾遇過Paul的呷醋女Fans？她大讚Paul的Fans愛屋及烏，早年已稱呼她為「阿嫂」：「因為佢哋叫阿Paul做阿哥，所以叫我做『阿嫂』。」她又稱其Fans也很愛錫Paul，剛收到他們為她訂造的Q版iPhone套，其中一個是送給男友的，她說：「一共有四個，三個係我個卡通樣，有一個係阿Paul個樣。有我個樣係畀阿Paul用，我得一個咋！」她的Fans亦會買飛捧Paul場，可惜今年Paul會流失她的Fans，她解釋：「因為我同男友個騷撞期，佢哋只可以捧到我場。」

Paul外表粗豪，問到可有被男友「蝦」？朱茵哈哈笑說：「梗係唔會啦！係我『食硬』佢至真，佢之前話我心情好，佢就有運行，呢句係真o架！」