深夜接走Macy 孫耀威鬧爆無綫

藝人陳美詩（Macy）與朱慧敏日前在日本拍攝旅遊節目時發生驚險車禍，心疼女友Macy而在微博鬧爆無綫的孫耀威（Eric），前晚漏夜到醫院接她出院。身為四大歌手的Eric，更拚死繼續狂轟無綫做騷，強調事件是某些人問題，雙方關係勢成水火。

陳美詩與朱慧敏在日本沖繩拍攝旅遊節目時釀嚴重車禍，二人及同車工作人員險送命。前日二人獲無綫安排返港求醫，但已漏夜出院，前者由男友孫耀威接送，後者則靜靜離開。

出事翌日即在微博鬧爆無綫的Eric，到九龍法國醫院接女友返深水埗寓所。前晚近凌晨，Eric率先步出醫院，未幾Macy在Eric公司員工陪同下步出；架着墨鏡的Macy不發一言上車，而身為四大歌手的Eric則拚死狂轟無綫！

對號入座即衰人

Eric透露Macy頸骨有少許移位，需接受物理治療，幸好未有傷及內臟，須休息數星期，並指Macy原本需要留院。問到會否多陪伴Macy，他只表示Macy父母正等她回家。問到有否致電無綫高層樂易玲反映，他即說：「冇同佢聯絡。」提到曾醒明指Macy事前已知要駕車，Eric即直斥安排有問題：「好多嘢我唔方便講，正如我喺微博所講，邊個對號入座，嗰個係衰人！」又強調Macy的車牌「嚴重生銹」，他早料到會有意外：「佢揸兩下十公里就要停車。」當得悉Macy擔任司機後，他每天致電說教：「我每日都問點解要揸？我話你揸唔到o架，條山路好似頭文字D咁。」

對於無綫高層拉隊接機，Eric認為只是事後補鑊：「Even今日（昨日）返嚟，係咪真係咁Care（藝人）？根本佢哋本身未必返到，只係可能我嘈完，先有好鋪張嘅安排。我又唔係呢間公司嘅！其實我對公司冇意見，係有啲人嘅做法我唔認同，要藝人尊重。」

昨晚，Eric接受now訪問時繼續投訴無綫，又指Macy他們要到山外的公廁沖涼，出事後亦一直沒有收到回港指示，直到他逐個高層打電話，無綫才開始正視問題，但不願評論事件是外判公司還是無綫責任。記者事後以短訊問Eric會否怕無綫秋後算帳？他以短訊回覆：「我不是怪罪無綫，只是某些人的疏忽或冷漠釀成意外令我難過。」　

朱慧敏感激舊石

而朱慧敏昨日接受電話訪問時透露其頸椎間盤移位，需休養兩周，稍後要接受物理治療：「好感恩，好感激舊石、同棵樹。」月中將拍新劇的她，不擔心傷勢影響工作。