Cammi隨時三失 Edison晒新寵自娛

陳冠希與學生o靚模謝芷蕙相戀1個月，因慾照曝光而告終，男方掟煲劃清界線，還上載「新寵」相片，女方則隨時面臨三失！

現年31歲的陳冠希（Edison）與年紀相距15載的16歲謝芷蕙（Cammi）近月才火速撻着，豈料二人咀嘴慾照前日開始紛紛流出，成為分手導火線，身在外地的Edison昨日單方面發出「單身聲明」狠飛Cammi，Cammi亦聲震震坦承已分手，Edison昨日繼續玩微博，上載寵物貓相：「My Favourite Pet！」反觀Cammi獨自面對傳媒追訪，加上失男友、隨時失學及失Job，分分鐘三失！

校方截車送走

身穿校服、戴上口罩及眼鏡的Cammi，昨晨7時許離開秀茂坪寓所乘的士到九龍灣返學，抵校時由1名男老師護送，當有人指她現在很出名，Cammi說：「唔要呀！」擾攘接近5分鐘，最後在4名老師、多名領袖生及校工的陪同下，Cammi終於進入校園。上課期間，她曾發短訊給本報記者：「我好傷心，你哋唔好再跟住我喇！」

至下午3時許，Cammi在老師保護下乘的士離校，後返抵寓所附近的商場，戴上口罩、化上淡妝的她終友善接受傳媒訪問，並脫下口罩說：「我好驚！16歲未見過呢啲情形，學校有搵我，對受影響嘅人致歉！（事後有冇同Edison聯絡？）冇！（怕唔怕有其他大膽相流出？）見報嗰啲已經係最性感！（同Edison有冇性關係？）冇！（有冇情慾短訊？）冇！（氹你着內衣？）我唔識答，唔答喇！」她表示未知今日會否返學，要再跟家人商量，或會去補習，父親亦有因事件不開心，最後她買食物後便返家。另外，放學時有兩位老師對記者表示Cammi請「事假」已走，但其後Cammi否認早退：「學校截的士送我走。」其後記者致電學校，但校方冇回應並匆匆收線。

暫時不會報警

雖然二人承認情侶關係，但Edison似乎未有給Cammi「女友」名分，多次被拍得撇低Cammi跟朋友四圍蒲，月前他跟朋友現身中環行街，上月他跟兩名男友人在跑馬地餐廳慶祝生日，也沒有叫Cammi相伴！據知情人士透露，二人分手後仍有聯絡，男方更叮囑她不要答傳媒問題。另外，Cammi經理人Admond承認校方有找Cammi談論事件：「校方覺得Cammi應該以學業為重，亦會有特別安排，搵人喺學校門口接佢返學！Cammi唔見咗電話本來想報警，不過佢阿爸唔想，所以唔會報住！」