陳美詩朱慧敏翻車墮坡險死

無綫藝人陳美詩（Macy）和朱慧敏前日在沖繩工作時發生意外，駕車衝落山坡，兩女被困車內，生死懸於一線！昨日她們返港，高層樂易玲與曾醒明接機，Macy男友孫耀威為此事怒轟無綫！

無綫藝人陳美詩（Macy）和朱慧敏上月30日飛往日本沖繩拍自駕遊旅遊特輯，不料於第三日、即前日於沖繩一個村落的山路，因天雨路滑跣胎，連人帶車衝落數百米的山坡，車身翻側。當時由Macy駕車，同車還有朱慧敏及兩名工作人員，由於事發地點較偏僻，加上與日本警方言語不通，眾人被困於車廂「半天吊」，生死一線間，等了約半小時才獲救，即前往當地醫院檢查傷勢。

頂硬上驚住揸

意外發生後，無綫昨日即安排Macy及朱慧敏返港，無綫高層樂易玲及曾醒明、藝人李亞男到機場接機，昨午5時45分，戴黑超的Macy及朱慧敏出閘，經歷意外的兩人不禁落淚，Macy坦言遇車禍很驚慌︰「真係好驚！好感恩可以返到嚟見大家，出事後以為自己冇事，點知返到房就不停震，震咗幾個鐘，控制唔到，之後就打畀屋企人報平安。」朱慧敏情緒激動地說︰「知道可以返香港真係鬆一口氣！我哋真係好好彩，大難不死！謝天謝地！有棵樹同一塊石頂住我哋架車，所以郁唔到，如果唔係應該……」她愈說愈激動，無法繼續講下去。

Macy表示有駕駛執照，但已約一年沒有駕駛，今次是頂硬上︰「男朋友（孫耀威）知我揸車唔熟，我都驚揸車，本身唔知要揸，直到佢哋叫我申請國際牌，我當時仲講笑話扮揸車就得，但最後負責揸車個同事去唔到，惟有逼自己揸。」

成口玻璃碎

Macy憶述當時情況，猶有餘悸︰「嗰時落緊大雨，落斜時Feel到跣胎已經扭軚，車尾就Fing出去，嚇到我大叫『耶穌救我』，之後成口玻璃！」朱慧敏則說︰「車尾爛晒，成個人倒轉咗，後面兩個疊埋一齊，沿路一個人都冇，嗰時已經四點，仲有一個鐘就天黑。後來有三十幾人嚟拯救，當時生死只差一線！」Macy直言獲救是奇迹︰「好驚冇人知道我哋出事，突然有兩個日本人跑嚟問咩事，其中一個仲識講英文，而且好彩個位不偏不倚，如果前或後一米，架車都冇嘢頂住。」她又指怕車移位，意外後全程踩住腳掣。兩人不忘感謝當地警方，接機後她們前往醫院檢查，需留院一晚。