羅仲謙楊怡 「暗郊」斷正

與傅穎兩離兩合並鬧出涉嫌虐打事件後，羅仲謙一度傳暗撻無綫花旦楊怡，二人連月來死口不認拍拖，終於在萬聖節被撞破鬼祟入郊野公園燒烤。

羅仲謙與傅穎糾纏多時的戀情最終泡湯，期間傳出羅仲謙狂溝圈中靚女，今年5月和無綫花旦楊怡合作《On Call 36小時》被指暗中撻着，雖然二人年紀相差5年，感情仍一日千里。楊怡於羅仲謙受分手事件影響、形象插水之際不時出言力撐，但二人齊聲否認拍拖，羅仲謙更揚言：「楊怡自己有車，我從來冇車過佢。」

言猶在耳，日前萬聖節，二人終於被撞破鬼祟約會。傍晚5時多，不用開工的羅仲謙駕車在將軍澳出現，直駛往楊怡住所，10多分鐘後座駕駛出，司機位旁多了素顏穿運動裝戴帽的楊怡，再駛往羅仲謙住所樓下，此時3名友人出現，開心地搬食物及飲品上車，楊怡也樂得站在一旁，指指點點叫大隻仔羅仲謙搬嘢。五人神秘地直闖人迹罕至的大埔大美督郊野公園，於昏暗環境下仍相當謹慎，挑選最偏僻的燒烤爐。身穿情侶運動裝的羅仲謙和楊怡愈坐愈埋，細聲講大聲笑，但未幾便發現攝影機。羅仲謙即說：「唔好影，費事嚇親啲朋友。（做咩嚟呢度燒嘢食？）我喺附近住。」但提到其他人住得遠時，他即無奈地揮手。

細聲講大聲笑

當記者上前拍照，二人即分開坐，狀甚尷尬，記者要求靠攏一點，楊怡說：「你哋影到咪影囉！影靚啲呀！要唔要一齊食，我燒埋畀你哋呀！」雖然二人表現得不介意被拍照，但記者甫離開，楊怡便急急拉朋友影合照，繼而放上微博，似是煞有介事。