杏兒打殘法拉 率先峰后

十大花旦、小生昨晚現身節目巡禮，幫無綫與廣告客戶Social。一班準視后順道拉票，大熱之一的胡杏兒得知新劇高開，即谷行咪咪搏到盡亮相，陳法拉與徐子珊亦不敢正面交「峰」。

無綫昨晚動員全台小生花旦，現身電視城出席節目巡禮，為明年廣告合約努力之餘，亦趁機與廣告商作近距離接觸順道撈。花旦個個各出奇謀搶「峰」頭，論搏命程度則以身穿Roberto Cavalli低胸裙谷咪上陣的杏兒最勁。不過，她表示谷到盡並非為爭視后做勢：「不嬲都要搏！總之適當時候就要進取，呢身裝扮冇得再性感，台慶當晚要睇Stylist搵唔搵到衫。（性感要黃宗澤過目？）冇喎！只想以最靚狀態出現。（《萬凰之王》收視高開，衫領低開當慶祝？）播咗兩集啫！仲要再睇，我喺微博都有宣傳個劇。」以低胸裙亮相的子珊對杏兒亦表示驚嘆：「我唔係今晚最性感，見到杏兒都嘩咗一聲，陣間要同佢影相。」

謝天華齊齊行性感

另一視后熱門、穿上密實長裙的法拉則笑言要留力台慶：「台慶梗係會再勁啲！節目巡禮、台慶到頒獎禮係三部曲。（終極性感？）會揀條啱自己Style嘅裙。」有份爭視后的楊怡則佩戴英皇珠寶贊助、價值730萬元的鑽飾兼微露事業線，她說：「今晚少少性感啦！希望事業都勁啲，套衫專登做！我會照舊親民，客戶都好斯文，唔怕畀人摸嘅！（點解法拉唔使招呼客戶？）呢啲公司安排。」

準視后鬥靚，準視帝亦玩暗戰！謝天華以低V裝亮相搶鏡，不讓花旦專美，他說：「天氣涼，個V冇得再低！」吳卓羲則笑說：「唔可以成日Deep V(o架)！（驚客戶太熱情？）我不知幾歡迎客戶搵我拍車、樓盤、電器廣告！」兩屆視帝黎耀祥則開腔撈：「我個仔鍾意影相，有相機廣告可以搵我，鄭伊健拍夠啦！」

另外，無綫昨晚播出多齣來年重頭劇的片花，其中《金枝慾孽Ⅱ》有鄧萃雯與蔡少芬咀嘴鏡頭，佘詩曼則在《4 in Love》裸背演出，《衝上雲霄2》找來上集機師吳鎮宇拍預告，有機在續集客串做機師。