鄧伊玲出狗招 轉啅巨胸男

o靚模鄧伊玲與娛樂主播黎國輝拍拖六年但嫁杏無期，等無可等下決定執嘢走人！回復自由的她與貌似王力宏的巨胸男到公園玩狗，態度曖昧！

有「E Cup教主」之稱的鄧伊玲（阿旦），與娛樂主播黎國輝（阿感）拍拖六年，可說是圈中的老夫老妻。不過，據阿旦身邊好友透露，阿感曾承諾三年內「上車」兼娶女友，可惜三年又三年，最後丁點行動也沒有！加上阿感生性花弗，令阿旦對男友失望到極點，為免一等再等，她狠下決心分手，放棄這隻「冇腳雀仔」。

促膝談心 耳邊私語

日前，阿旦被拍得拖着行李篋搬離九龍塘寓所，神情落寞兼雙眼通紅，看來傷心至極。其實阿旦跳船，當然不怕冇着落，日前便相約一名貌似王力宏的大隻仔到九龍塘，帶埋愛犬散步談心，關係非比尋常！現場所見，「大乳力宏」不但胸肌大過股肌，身高亦至少高阿感4吋，加上靚仔有型，難怪阿旦不時含情脈脈望實對方。

「大乳力宏」氹女仔亦有一手，每見阿旦心事重重，即講笑話氹她哈哈大笑，兩人又在耳邊喁喁細語，狀甚曖昧。促膝談心後，兩人與小狗走入草坡緩步而行，只見狗仔甚為鹹濕，不停撲向阿旦胸前，「大乳力宏」即示意：「No！」場面搞笑。未幾狗有三急，男方晒麒麟臂「執金」，令阿旦冧得一陣陣。

記者事後致電阿旦，問到是否與阿感出現問題？她說：「係！不過唔想講咁多，其實我年紀唔細，真係要為將來打算，但佢似太安於現狀，唔想改變囉！」她又解釋跟「大乳力宏」只是玩狗仔，大家是模特兒故同聲同氣，別無其他關係，問到發展可能？她說：「的確係好男仔，又鍾意小動物，將來嘅事將來先算。」