鍾一憲麥貝夷 爆萬聖節撞鬼驚魂

歌手鍾一憲（Jason）與麥貝夷（Karene）齊齊扮嘢預祝萬聖節及分享趣事，Jason自爆在中東的撞鬼經歷，更慘被異國惡靈喪睥，Karene則因被「鬼」追而仆親！

萬聖節將至，憑合唱歌《勾手指尾》熱爆YouTube的歌手Jason及Karene扮嘢玩到癲，Jason更憶述一次中東驚「魂」：「一入房已經覺得周身唔聚財，點知夜晚就畀鬼壓，之後仲見到張被凌空飛起！」其後他往洗澡冷靜心靈，豈料愈沖愈見鬼，正想倒頭大睡之際，他驚見兩名中東男士在門口怒睥自己，連房中的iPad亦突然自動播歌，相當詭異！

嚇到仆穿褲

談到節日趣事，Karene透露早前到主題公園的鬼屋探險時因被「鬼」追而見紅，她說：「我不嬲都好細膽，隻鬼係咁追我，搞到我『雞咁腳』咁跑，最尾仆倒連條褲都穿埋！」而Jason則自爆曾參加萬聖節脫衣派對，他說：「啲人跳跳吓舞突然除晒衫，得番內衣褲，有男有女！」並大呻遭滿身臭汗的「麻甩佬」埋身喪磨：「佢哋仲邊跳邊食煙，好有『味』力囉！」

此外，Jason笑言有「被嚇狂」，加上情迷殭屍片，故稍後將以清朝殭屍Look出席公司的萬聖節Party，而Karene則笑稱要扮紙紮公仔與對方配成一對，兩人認真老友！