莊思敏偷師 寸o靚模無知

莊思敏與白健恩最近合演以「愛滋病」為題的舞台劇，莊思敏飾演一名無知少女，她聲稱會向o靚模參考學扮無知：「每個o靚模都有嘢學到！」

模特兒莊思敏與演員白健恩（小白）最近忙於綵排舞台劇《滋．情．識．取》，該劇是為紀念及回顧「香港愛滋病基金會」成立20周年而製作，莊思敏表示過去幾年也有跟該會合作：「支持佢哋！唔會歧視愛滋病人，其實愛滋病已經冇當年咁恐怖，佢哋都可以結婚生仔。」

白健恩晒舞功

莊思敏今次挑戰演技，飾演與現實性格完全相反的無知少女，她笑言會向時下o靚模偷師：「會參考o靚模扮無知！（有冇特別向邊個學？）每個o靚模都有唔同嘅無知嘢學到！」

至於演藝學院音樂劇舞系出身的小白，於劇中飾演陽光義工，會跟其他演員載歌載舞，對舞功高強的他來說可謂零難度：「到時會一班人一齊跳舞，每次都好享受，最鍾意成班人喺台上表演！」他亦會跟劇中另一演員吳彤合唱主題曲《彼岸煙花》。

由於該劇只會以邀請及公開派發門票，就算有錢都買不到飛！近日跟林忠豪緋聞傳得熱烘烘的莊思敏笑言，若追求者想睇的話，便要自己想辦法撲飛！