JC講內涵：外表唔係一切

Jessica C.（JC）憑警鐘胸闖出名堂，她深明噴血身材確能引人注意，增加曝光率，但她更想別人認識自己的本質。敲響警鐘後，JC決定以工作表現去證明自己實力，並非空有外表。

最初畀人話係警鐘胸好唔開心，覺得受傷害，因為當時我仲未明白娛樂圈呢行，唔明點解啲人要將我評頭品足，喺度審判我。當我明白到呢行嘅運作，我已經唔會再介意，淨係會覺得好好笑！我依家見到警鐘都會覺得好搞笑！傳媒用警鐘胸嚟形容我，係一種幽默。我知道我嘅身材可以吸引到人哋嘅注意，當人哋注意咗我，我先可以畀大家認識我更多。我可以輕易咁靠身材繼續我嘅模特兒事業，着比堅尼同低胸衫，但除咗我嘅身材，就唔會再有其他，我想人哋認識我內在嘅一面、我嘅本質。

我想做一個好榜樣，等啲女仔知道一個人唔係只得外表，內在先係最重要。唔好嘅性格比起唔好嘅外表更差。有啲人會將我兩個妹妹同我比較，話佢哋冇家姐咁靚、咁好身材，妹妹每次聽到都會唔開心，我會話畀佢哋知要識得欣賞自己，外表並唔係一切。

靠本質個性引人注意

我嘅身材係嫲嫲嗰邊遺傳畀我，嫲嫲同埋啲姑姐嘅身材仲犀利過我。我唔知係咪真係有用，但我細細個已經成日食木瓜同飲牛奶，唔係因為想身材好啲，而係我的確鍾意食。有時我會覺得細胸更加好睇，着某啲衫更加有型。其實當我唔着Bra時，我唔覺得自己個胸特別大。我最關心嘅並唔係我個胸今日好唔好睇，而係集中喺點用我嘅本質同個性去吸引人嘅注意。我想啲人認識Jessica係一個點樣嘅女仔，而唔係只知道我有警鐘胸。近年有好多模都靠身材、靠性感出位，每個女仔都有唔同嘅目標，但想提醒佢哋，所行嘅每一步都要好小心。

JC雖然人紅，卻從未恃寵生驕，不會多多要求難服侍。平日總有化妝師和髮型師為她扮靚Set頭，她只需坐定定等人服侍。但因合作無間的化妝師有事，訪問當日，JC索性親自上陣為自己化妝，帶了大袋私伙化妝品和工具的她雖然要落手落腳，卻毫無怨言。她還為髮型師準備了一個小小的髮飾用品箱，方便對方Set頭，細心又體貼！