JC怨Sergio：佢對我不忠

Jessica C.（JC）曾深愛前男友Sergio，但因他不忠而傷心失望，痛定思痛的她學會揀男友首重人品。目前忙於工作的她未想開始新一段感情，因經常四圍飛怕難以維繫。

我每一次拍拖都好認真好投入，同嗰個人拍拖時就會想同佢結婚。我曾經好愛Sergio，想同佢有將來，分開係因為佢對我不忠，我知道時真係好傷心，好失望。我哋兩個曾經一度想修好番段關係，可惜事與願違，最後都係Work Out唔到。我心入面已經有條刺，個感覺已經唔同咗，嗰份愛已經變咗質，對佢亦都冇晒信心，根本冇辦法再繼續落去。選擇分手對我嚟講係一個好艱難同好唔捨得嘅決定，但係再喺埋一齊只會浪費時間，無謂勉強再拖落去。

今次嘅事都影響咗我日後揀男朋友嘅要求，內在美係重要過外在美，我會睇佢嘅人品先，唔會貪靚仔。而且人大咗，成熟咗都要搵個成熟啲嘅男朋友。呢一年我嘅工作令我接觸到好多人同事，亦加速咗我嘅成長，我同Sergio嘅步伐已經唔同咗，思想亦都唔同咗，大家嘅距離同隔膜愈嚟愈大，好難去磨合。

唔心急拍拖

依家我嘅心情已經回復得七七八八，只係仲有啲唔慣，返到屋企唔會再有人畀我挨住，少咗對男朋友嗰份牽掛。我唔心急去發展一段新感情，同埋我成日要周圍飛，同男朋友分隔兩地好難維繫，所以目前寧願單身。我仍然相信愛情，我知道我會遇到我嘅Mr.Right，有日總會結婚，但依家要工作先，結咗婚之後我就會生BB，要照顧屋企，我嘅人生會多咗丈夫同小朋友，唔會再有咁多時間可以工作。現階段我嘅人生依然係屬於我自己，我要為我嘅理想去努力。