徐子淇陪「男友仔」老公呷晒醋

千億新抱徐子淇昨日出席慈善活動時暢談仔女經，她表示囝囝出世後，令她重拾初戀感覺，像多了一個小男友，連老公李家誠也呷囝囝醋！

徐子淇昨日以智行基金慈善大使身份，與任達華和歐陽妙芝出席慈善義賣活動。身穿低胸連身短裙的子淇身材Fit爆，在台上分享與囝囝李俊熹的溫馨合照，一臉幸福。問到是否比生仔前更纖瘦？她說：「應該唔夠之前瘦，但我唔想減肥，唔想傷身，依家唔係做Model，淨係想健健康康。（湊三個小朋友運動量好大？）係，我每日瞓得5個半鐘咋！（要親力親為？）我唔會畀人湊，唔想人哋幫我湊，如果有能力都想自己湊，外傭唔會教、只會寵，自己湊先會聽話。兩個囡囡都要返學，個仔仲咁細個，都花我好多時間，又要陪老公。」子淇笑言老公李家誠沒有幫忙湊BB，只負責跟BB玩。她表示暫時不會再生，何時再追多個則隨緣。

開P玩馬戲團主題

子淇透露囝囝已有十六、七磅重，肥嘟嘟很可愛：「未生之前，我同自己講會錫囡囡多啲，因為女仔係Sweet啲、嗲啲，同佢哋Close啲，好想保護佢哋。但生完個仔之後，有番初戀嘅感覺，個心融咗，好耐冇試過呢種感覺，好似多咗個男朋友仔咁。（老公呷醋？）有呀！好搞笑！佢見我去睇囝囝會話『你又睇佢唔理我。』我夜晚要等佢瞓咗，先去睇囝囝同餵夜奶，之前又要陪咗家姐先，但家姐好錫細佬，冇呷醋。」提到本報日前獨家報道她將為囝囝舉行歡迎Party？她說：「之前已經同屋企人食咗飯，但有好多朋友都未見過BB，想一次過畀啲朋友見吓BB。」

而其大伯李家傑的三胞胎屆時會一起參加Party，主題是馬戲團，因她小時候很想做空中飛人：「個Party會好似個嘉年華咁，囝囝依家咁細未識，但兩個家姐會好開心，囝囝第時睇番都會好開心！」