樂瞳糖妹愛情0分

宅男以往均喜歡身形高挑及身材「澎湃」的女星，但近年口味轉變不少，鍾情細細粒「的骰」玉女！糖妹和樂瞳今年憑嬌小可人兒形象，火速成為「宅男女神」，可惜現實中「女神」的感情卻一片空白，還未遇上心目中的白馬王子！

身高5呎2吋的樂瞳，早前在劇集飾演學生妹而人氣急升，更一度登上網上人氣王，與糖妹雙雙成為「宅男女神」。不過現年25歲的樂瞳表示，這個稱號雖令她為人認知，但卻不太認同：「我從來唔覺得自己係宅男女神，條件唔符合。（糖妹適合啲？）係囉！（怕比較？）唔會，我哋外形係有啲似，但性格根本唔同。」

角色求變

問到會否擔心被指「扮Cute」？她說：「有少少唔自在，從來都唔係Cute，冇刻意營造，唔想被定型為『可愛派』，自己都怕悶。（性感？）人哋只會覺得搞笑，喺我心目中，官恩娜同莫文蔚先係屬於性感女星。」

出道至今，樂瞳曾拍過不少劇集，今年更憑《點解阿Sir係阿Sir》飾演「中女」學生妹及《法證先鋒Ⅲ》的「天眼少女」角色，備受網友談論，不過樂瞳直言經常演少女、學生妹及乖乖女等角色，也是時候求變，她說：「我想演啲大個女角色，好似係專業人士。（再演妹仔呢？）唔抗拒，但有得變我都想變，自己想長大，演員要有突破，唔想被框死。」

貴為宅男女神，裙下之臣理應多不勝數，但樂瞳的感情生活與糖妹一樣空白：「冇感情可言，亦都冇人追，呢幾個月忙住拍劇，『斷六親』咁滯，返到屋企父母都瞓晒覺，有時好難先見到一面同食餐飯。」

圈中潮流興閃婚，樂瞳表示將來不排除這個可能性：「我諗我會閃婚，可能同對方只係識咗一個禮拜，男方如果向我求婚，我會答『好呀！』幾浪漫，好憧憬呢個場面。（生BB？）我好鍾意小朋友，一定會生BB，依家拍緊《當旺爸爸》，有同小朋友戲份，佢哋好得意。」

努力儲錢

入行已經五年的樂瞳最近劇接劇，她感激公司給予機會：「舊年係播種期，今年算係收成期，多咗劇集入屋。」問到收入是否理想？她表示財政狀況較從前為佳：「之前都試過拮据，日日掹掹緊，只係得份底薪，只夠搭車食飯。（要做慳妹？）近排荷包鬆動咗，都唔會太過慳，但我會好努力儲錢，因為呢行嘅收入幾難控制，好被動，我要多啲爭取機會，Keep住有嘢做。」

獎項隨緣

樂瞳在《點》劇的演出備受讚賞，問到有否信心提名電視頒獎禮獎項？她謙稱：「若然有提名已經好好，係一種鼓勵。每年都有港姐、港男、超級巨聲湧現，都幾難爭，隨緣啦！」

她在《當》劇與鍾嘉欣、商天娥、胡定欣及張兆輝等好戲之人合作，問到會否感壓力？她說：「開頭有少少，佢哋全部係演技派，不過合作耐咗，好快融入，定欣幫咗我好多，劇中有跳舞場面，佢教我點樣邊跳邊演；至於嘉欣係再度合作，之前大家演過師生，今次就演姊妹，同佢愈來愈熟落。」

後記：「瞳」努力

樂瞳未上位前試過任節目的「禮物小姐」，她深明默默耕耘道理，經過不斷努力，今年憑學生妹角色成功彈出，雖然與一線花旦仍有距離，但她會努力鑽研演技，裝備自己。

唱作樂隊糖兄妹的黃山怡（糖妹），以4呎8吋「的骰」身形及Cute爆表情殺入樂壇，令不少宅男「嗒糖」，加上聲線及外形與女歌手陳慧嫻酷似，被冠以「嫩版陳慧嫻」，連她也笑言與慧嫻似「失散姊妹」。

不愛比較

問到背負「宅男女神」稱號會否感到壓力？她說：「冇呀！一開始知道有呢個名都覺得幾好，多咗好多表演機會，啲歌亦多咗好多人轉發，但久而久之，呢個稱呼好似愈變愈濫，搞到大家只係在意表面嘢，忽略咗我哋工作同音樂，變咗『花瓶』角色。（抗拒呢個稱號？）免疫咗。」

對於外間愛將她和樂瞳作比較，現年24歲的糖妹說：「人比人，比死人！每個歌手同演員有佢個人風格，大家路線唔同，我都有留意佢喺劇集『天眼少女』嘅角色。」至於會否擔心外界說她「裝可愛」？糖妹帶笑自嘲：「咁矮唔扮Cute做乜？而且啲歌係以少女心態去唱，唔理人點睇，鍾意嘅人自然會鍾意。」

羨慕Baby

談及心目中的宅男女神，糖妹面露羨慕神色說：「Angelababy！我有買佢寫真集同睇佢啲戲，未見過Baby，好想見佢，佢係有涵養同埋勤力嘅女仔。」談及感情生活，她表示一片空白，連暗戀對象也沒有。對於早前被指已婚，糖妹說：「呢單嘢簡直成為事業上『高峰』，公司同事都笑我嫁咗塊紙牌，所以我哋有首新歌《別煩着我》。」

對於與Bro5靚仔成員Dominic傳緋聞，她說：「我哋識咗好耐，知佢為人，咁佢係靚仔、大隻同Funny，唔啱我。（降低擇偶條件？）唔使太大隻o架！但要有陽光笑容，同埋思想要成熟，唔使一定呢行嘅！（試過Check情人訊息？）以前有，我覺得既然問心無愧，應該冇問題，大個咗先知道要互相尊重。（公開戀情？）會呀！」天秤座的她表示不介意主動出擊追男仔：「將來遇到合適對象，表白時唔介意做主動，幸福係要自己爭取。」

出道至今外界焦點往往落在糖妹身上而忽略糖兄，加上兩人試過單飛發展，問到會否擔心傳拆夥？她說：「我唔擔心，當局者清，我哋係創作樂隊，咁多年都係咁，不過有時女仔會多啲廣告工作。（糖兄向你吐苦水？）冇，佢有佢忙嘅嘢！」

收入上升

糖兄妹今年工作不斷，12月初還舉行售票音樂會，她說：「舊年開始已經諗點做，但今年多咗好多工作，又出書同拍旅遊特輯，所以褪到12月先舉行。」糖妹渴望屆時能邀請范曉萱及林宥嘉任嘉賓，至於會否擔心「妹仔大過主人婆」？她笑說：「唔怕佢哋搶風頭，佢哋都係我偶像。」問到今年是否收入甚豐？她說：「賺多咗人氣。（錢呢？）都OK，但我唔會經常Check住。」

後記：「糖」不甩

雖然糖妹已對「宅男女神」的稱號「免疫」，惟當她拍照時，愛擺Chok爆可愛甫士，舉手投足似足妹仔，依舊甩不掉那種甜甜的「糖」味，仍然惹人憐愛呢！