陳柏宇掃背晒戀情

歌手陳柏宇（Jason）前晚跟江若琳師妹符曉薇（Leanne）逛街，兩人掃背又餵糖，態度甜蜜親暱。Jason向本報大方承認戀情，令Leanne冧爆大讚「好Man」！

前晚Jason跟Leanne到中環行街街，兩人似乎非常投契，全程雞啄唔斷，期間Jason煙癮發作，Leanne亦樂意陪伴在側，完全不介意食「二手煙」。雖然未有斬獲，但仍非常享受，其後他倆放下戒心，Jason情不自禁出手為女友掃背，而冧爆的Leanne又餵Jason食香口膠，態度異常親密，Jason還走入便利店，用儲來的印花換馬騮公仔，氹到Leanne歡喜若狂。最後，二人搭港鐵離開，未知是否因拍攝電影《喜愛夜蒲》而火速撻着？

公司冇反對

本報記者致電Leanne求證時，她支吾以對不敢多講，只稱兩人是朋友關係，相反Jason一反常態，公開承認戀情：「係拍拖，我哋啱啱開始，一齊好開心，現階段希望大家畀空間我哋！」對於Jason大方「認頭」，Leanne大讚好Man：「佢不嬲都係咁Man，其實一直冇諗住隱瞞，只係怕阻住佢工作發展，依家都會繼續拍拖行街，公司都冇反對！」