朱晨麗許亦妮行街開餐Friend番

應屆港姐冠軍朱晨麗、亞軍朱希敏及季軍許亦妮，當選不久已傳出玩杯葛，但日前她們工作後，相約到銅鑼灣行街開餐，更有講有笑，實行以行動粉碎不和傳言。

應屆港姐是非傳不停，早前有傳冠軍朱晨麗及亞軍朱希敏連成一線排擠賽前大熱的季軍許亦妮，有指朱晨麗與許亦妮人前扮Friend，私底下口和心不和。不過，日前記者發現三人在銅鑼灣工作後，「柴娃娃」相約到附近行街，期間見朱晨麗與許亦妮特別好傾，甚為老友，看似以行動打破不和傳言。

搭港鐵不停煲粥

當日下午5時許，三人工作後即結伴在附近商場行街，雖然不少途人眼望望，但她們一於少理，繼續邊行邊傾，甚為投契。其後一起進入了附近一間麵店開餐，半小時後便埋單離開。醫肚後，拖住行李箱的朱希敏跟兩人道別後先行離開，而一直被指不和的朱晨麗和許亦妮則繼續在該處行逛，沿途有說有笑。

另一日，朱晨麗獨自在九龍塘出席活動後，由助手陪同到附近時裝店還衫，原本穿性感短裙的她，即場換回便服。其後，她朝港鐵站方向走去，到達港鐵站後，她即靠近牆邊，用右腳大髀頂着紙袋，再從手袋拿出另一部電話查看，再整理隨身物品，幾經辛苦才摷出八達通入閘，相當狼狽。她進入月台後，隨即搵位坐低，並繼續煲電話粥，直至列車駛至，她才起身上車。

朱晨麗昨日出席活動，對於因與陳法拉相似，故擔任電影片《LAUGHING GOR之潛罪犯》女主角，她說：「暫時未知，都係睇公司安排！係好事，始終法拉係大師姐，但我都希望觀眾會認識我係朱晨麗，而唔係邊個嘅翻版囉！」