Jeana棄愛認自私

o靚模Jeana靠張嘴寸盡同行，「講女」成功殺出新血路，卻為得天下犧牲愛情；同樣靠一張嘴，「講男」森美以科學數據分析「情聖」，培訓翻版謝霆鋒！

大部分港女在港男眼中都是「拜金」一族，希望男友有錢又靚仔，但現年22歲、剛回復單身的o靚模Jeana（何佩瑜）則不願隨波逐流︰「冇話咩男仔係唔好嘅，我唔係貪有錢靚仔嗰種，但如果為咗錢一齊但唔開心，做咩要咁呢？」Jeana看似替港男講好說話，但其實亦彈港男欠缺心思︰「其實女仔需要男仔做啲窩心嘅嘢，一個鼓勵、擁抱或者煮愛心食物，好簡單就已經好開心。」

抗拒偷食 寸港男猴擒

「只在乎天長地久，不在乎曾經擁有!」Jeana直言要愛就要愛得轟烈︰「我鍾意一個人唔會玩玩吓，好死心塌地，唔會再有位容納第二個，拍拖時試過有第三者出現，但當然發展唔到啦！」提到「偷食」、「小三」無論圈內圈外均經常發生，但在Jeana的字典中並沒有出現，她說︰「偷食其實好似玩大細，一係瞞一世，一係就穿煲，點解仲要去冒呢個險呢？咪又係因為貪刺激，但我就唔會囉！」

Jeana正式拍拖只有兩次，一是拍拖3年的初戀，二是跟圍村前男友的4年情，其他則是「散拖」。提到拍散拖，她不忘以「猴擒」形容港男︰「我喺感情方面比較慢熱，但啲男仔真係好猴擒，追到就想拖手、錫甚至再進一步，想快啲達到目標。佢哋愈逼我就愈反感，咪分手囉！」

面對4年情盡，Jeana感嘆全因價值觀不同︰「佢係圍村人，身邊只有屋企人同朋友，覺得出到去咩都唔識，寧願留喺自己世界，但我唔甘心留喺條村一世，可能係自私，但每個人都有夢想！」前男友逼婚及不想她繼續於圈中發展，亦成為分手導火線，她說︰「我都會結婚，但唔係呢個時候，冇理由叫我22歲結婚！」 不過，Jeana認為兩者其實可並存︰「只要比例唔同就得，自己會去調節。」

長相廝守 還是他最好

談到女人的終身幸福，Jeana指圍村前男友是她那杯茶︰「我有諗過佢係我終身伴侶，佢好內向又死板，唔識氹女仔，可能唔啱做男友，但係結婚首選！唔知係咪『Right person but wrong timing』呢？之前入行同佢講話玩吓，但佢見到依家我咁樣，覺得我未玩夠，但大家仲鍾意對方。」雖然仍有愛意，但問到會否復合？她即反應甚大地說︰「幾時？10年後？如果我冇新戀情而又仲鍾意佢嘅話就會考慮，但一齊番未必一定會開心！」

後記：受情傷心神恍惚

與Jeana做專訪已不是第一次，未知是否受情傷打擊，她今次收起以往的笑容，閒聊、拍照反應總慢人一拍，心事重重，她更為此致歉︰「我呢排心情真係好差，分手後好唔開心，瞓得唔好，唔好意思呀。」愛情的魔力真可怕!

後記：開騷叫女人檢討

90年代盛產「情聖」，最能代表該年代就是Rock Band，故森美年底的Talk騷找來樂隊Hardpack助陣兼創作主題曲。他說：「男人冇錯，我為男人而戰，要現場女士即場填表分析『中女』、『港女』同『剩女』，希望女人好好檢討。」