Evelyn爛面急求陽氣

日模松岡李那與o靚模蔡穎恩（Evelyn）昨日出席時裝活動，二人同病相憐，前者患上抑鬱，後者爛面，可惜同人唔同命，松岡獲男友照顧，難怪甩拖不久的Evelyn要急急搵男友吸陽氣。

日模松岡李那、o靚模蔡穎恩、陳嘉寶，昨日與韓星蔡恩真出席Miffy x 2%專門店開幕，早前有報道指松岡患上抑鬱症，她直認不諱：「依家已經好番好多，我有睇醫生同食藥，男友好照顧我。我因為節食減肥，所以好容易又食唔落嘢，男友會叫我食多啲，又會餵我食嘢，佢好擔心我。」

學普通話壓力大

松岡自稱思想正面，不明白為何患上抑鬱，有傳因經理人王友良逼她學普通話而備受壓力，松岡說：「真係幾大壓力，我初來香港時會喊，因為唔識講又唔識聽廣東話，又好掛住屋企。」

至於早前爛面的Evelyn，至今仍未好轉，她表示可能工作太忙，休息不足所致，但否認與樂隊Mr.成員Tom分手有關，她說：「我依家心情好好。（識個男仔會好啲？）識咗。（男朋友？）唔係，仲等緊，我都想，畀啲陽氣我，希望搵個好男仔。（之前嗰個唔好？）我哋可以做好好嘅朋友。（唔怕佢老婆呷醋？）唔想再講。」