馬賽學做港女與波比鬥戲

無綫小花馬賽在新劇中扮演歐陽震華的妺妹，但被家人寵壞成為典型港女，現實中她高呼不是港女，事前花了不少時間睇片「學嘢」！

馬賽在劇集《不速之約》中扮演被家人錫到燶，因而患有「公主病」的典型港女，相當惹人注目！自稱現實中不是港女的她，惟有事前上網睇片及向友人借鏡：「我覺得自己一啲都唔似港女！但係香港好多女仔都係咁，做人冇目標！如果做人冇夢想，好似冇咗人生意義咁！我亦唔會亂使錢、亂發脾氣，賺錢好辛苦，點能夠亂使呢！」

馬賽難得與歐陽震華（波比）合作，二人飾演兄妹，令她獲益良多：「波比知我係新人，好照顧我，所以第一次同佢拍劇壓力都唔係咁大！我同波比都好鍾意食嘢，開工時不停咁食，畀人哋笑我哋十足十兄妹！」

個性獨立冇人追

馬賽表示現時沒有拍拖，問到是否其獨立個性嚇退追求者？她笑說：「係女仔都想拍拖嘅，我都唔例外，不過身邊冇追求者囉！可能係同自己性格有關，唔鍾意嘅就會即刻落閘，未遇到啱嘅就唔想浪費大家嘅時間！」