吳卓羲唔恨攞視帝

跟吳卓羲（Ron）同期的林峯、黃宗澤都有望競逐今年視帝，與獎項無緣的他坦言不會不快，更從不奢望得獎，而對緋聞女友張馨予，他卻不欲多談。

曾憑外購劇《大丫鬟》於有線勇奪視帝獎項的Ron，與無綫獎項一直無緣，眼見同期的林峯、黃宗澤被視為視帝大熱，他表示拍劇並非為得獎，故不會不快：「我從冇奢望過攞獎，喺TVB都11年幾喇，攞獎呢啲隨緣，自己只係想工作上有更多表現。」

問到近年有否遇過喜歡的角色？他說：「我幾鍾意《抉宅男女》，劇入面同鍾嘉欣一對，係一個唔望發達、畀另一半背叛嘅男人，好多內心戲都好投入。」於新劇《法證先鋒III》中飾演重案組警員的他，笑言是無綫小生中最常飾演警員的一人：「唔會悶嘅，今次喺《法證III》做重案組，之前《學警狙擊》做臥底，啱啱拍完嘅《ATF反恐》就係類似飛虎隊嘅，啲對白又有好多唔同嘅專有名詞，一啲都唔相似。」

公開戀情壓力大

提到跟緋聞女友張馨予的關係，Ron稱不欲多談私事：「咁多年嚟傳過好多緋聞，又唔係事實，希望大家畀啲空間我識吓朋友。（拍拖都唔公開？）如果將來我結婚會講，拍拖就唔會刻意提囉！做藝人啫！下下都要扯開肚皮，真係好大壓力。」