JC後悔包養Sergio

「警鐘胸」Jessica C.（JC）與巴西籍男友Sergio分手！JC昨日首度開腔承認回復單身兩個月，還暗示男方有第三者，後悔之前供養他！

本報早前獨家報道JC與男友分手，在Sergio的Facebook內發現多張攬女夜蒲相！JC昨日出席其代言的內衣騷，照例凸顯「警鐘胸」兼透股，透出內裏的T-back，吸引近百龍友拍照，同場還有亞姐冠軍Vita C.行騷。狀態大勇的JC，自爆已回復單身：「我好好，但好大改變，因為依家一個人生活！（已分手？）係，因為我哋目標唔同，我啱啱喺台灣拍戲，要花好多時間，大家都唔想拖累對方！」

JC坦言4年來未試過單身，分手令她很傷心，但現已重生，問到可有男仔追？她說：「唔知，因為忙住工作！（男友有第三者？）希望佢係之後先識……（幾時分手？）兩個月前，我剛去LA工作時，嗰時幾辛苦，工作又辛苦，嗰邊又冇乜朋友！」她的工作量比Sergio多幾倍，亦曾認畀錢男友使，問到是否後悔？她說：「係！分手時覺得浪費！自己好好彩，搵到工作可以賺錢，係一個學習機會，累積咗經驗，錢可以搵得番！」

基仔撐冇事

JC表示是和平分手，但難有復合機會：「依家工作先，希望真命天子有日搵我！（想要乜男友？）想要同我一樣有工作熱誠嘅人！（男友唔努力？）佢都努力，但喺唔同方面，想搵個可以激發我嘅男友，唔一定要有錢人！」另外，JC將擔任古巨基演唱會嘉賓，基仔對她與男友分手不知情：「我唔覺佢有嘢。（安慰佢？）唔好啦！好似好八卦咁，希望佢情傷快啲痊愈！」為配合個唱，他設計了一批限量紀念品。