鍾麗緹返港換畫又拖仔

兩度失婚的鍾麗緹（Christy）身邊不乏男伴，繼被踢爆於北京與四眼男陪撐枱腳後，昨日又與一名貌似大S老公的「翻版汪小菲」男伴在中環行街，更親暱得十指緊扣兼攬腰，當場斷正的Christy雖頻頻甜笑，但其後即與男伴分頭速閃。

曾是性感女神的鍾麗緹，昔日迷倒不少男Fans，雖然十年間兩度失婚，但身邊依然不乏男伴，除不時被拍到有男士陪伴左右，日前又被拍得她在北京密會四眼男，二人於餐廳撐枱腳時，Christy不時被氹到甜甜笑。

昨午二時許，甚少回港的鍾麗緹被發現與一名年約三十多、貌似大S老公汪小菲的型男在中環行街掃貨。現場所見，Christy與男伴於該處的童裝店購物，期間她更為女兒揀選靚裙、玩具及奶嘴，男伴則不時在旁給予意見，兩人有商有量，Christy逗留約半小時後已大有斬獲，並由男伴代拿戰利品。

街頭糖黐豆

Christy其後與男伴肩並肩步出門口，沿途離開時她還主動攬着男伴的腰，但當引來途人目光後，他倆則稍為避忌，前後腳步往乘扶手電梯離開商場。其後他們行至街頭，又情不自禁糖黐豆，十指緊扣於鬧市漫遊。

否認結新歡

當記者上前拍照時，他倆驚訝得急急鬆開手，問到男友如何稱呼，Christy初時甜笑不語，再追問男伴是否男友，她說：「唔係，好朋友嚟！識咗好耐。（見你哋拖手又攬腰？）我鬼妹仔性格，對朋友好熱情，唔好誤會。（佢係咪追你？）哎吔！同佢識咗咁耐，冇諗呢啲嘢！」

提到不時見她身邊有男伴相陪，Christy笑說：「咁我男仔朋友多嘛！」當Christy邊行邊接受記者訪問時，男伴未有尾隨，反而離遠站於街頭，Christy則多次回頭尋找男伴蹤影，其後分道揚鑣速閃。