馬浚偉馬德鐘離巢有彎轉

一場挖角風暴，勢令無綫鳥獸散，陳志雲即肩負重責速速救亡！志雲大師已落鞭施法，致電早有離心的馬浚偉加以安撫；而馬德鐘的喊走態度亦明顯軟化，只可惜大師卻留不到頭號愛將王喜，眼白白讓他蟬過別枝！

無綫面臨嚴峻考驗，一場世紀挖角風暴直搗無綫心臟藝員部，令小生花旦紛紛喊走！馬浚偉和馬德鐘曾對娘家有不少微言，令二人出走傳聞甚囂塵上，為了安撫二人，無綫總經理陳志雲終於出招！在六嬸方逸華欽點下，志雲擔起收拾殘局的重責，最迫切的是挽留人才。為穩定軍心，據知志雲親自致電馬浚偉予以安撫。記者昨日致電馬浚偉時，他不諱言志雲曾主動跟他傾約：「我承認陳生已經同我通過電話，但未有時間坐低細談，佢都知我開緊劇，佢有主動打畀我了解我情況。」問到是否跟對方通話後鬱結盡解？他笑說：「哈哈！我依家冇乜唔舒服喎！要向前看，唔係向錢看，我真係大個！下個月尾都40歲生日，要諗清楚啲。」談到幕後被挖角，他坦言每個人都希望得到好待遇，但最緊要是冷靜分析，不要隨波逐流，考慮自己問題為先。

出齊銀彈人情牌

據知，馬浚偉與無綫的合約正洽談中，他表示兩周前曾與樂易玲傾合約問題，但近日因埋首為新劇開工，未有時間再傾。他坦言六叔愛將陳輝光及高層曾勵珍有跟他傾談過，問到二人是否安撫他？他說：「我又唔係要安撫，我之前提出解約嘅原因公司都好清楚！」他表示與無綫仍有問題存在，錢並非關鍵所在，更重要是未來發展。

志雲一出手，馬浚偉喊走諗法即變，而與無綫合約到年底便完結的馬德鐘態度亦軟化。他接受電話訪時承認跟樂易玲傾合作形式：「佢哋開嘅條件好吸引，考慮當中，不過喺公司咁多年，想出去睇吓，自己係包薪藝員合約（親生仔），但近一年都主力拍內地劇！」問到無綫放他闖世界？他說：「我唔知人哋，但可能我傾嗰份合約符合到公司要求，我又係包薪，幫公司賺到錢佢哋都開心。」對於志雲親自跟藝人傾約，他說：「之前一直係樂小姐同我傾，陳生冇聯絡我，邊個傾冇所謂，最緊要睇自己意向。」問他與無綫續約成數多少？他思索了一會說：「五五波啦！」

法拉講心唔講金

即使志雲留得住「雙馬」，也留不住頭號愛將王喜！已完成娘家所有工作的王喜，月底正式約滿無綫，昨日有人目睹即將回復自由身的他與now高層何麗全在紅磡密斟，據知雙方見面氣氛融洽，勢必一拍即合，可惜記者趕到現場時，王喜已走人，換上是梅小惠與何麗全繼續吹水。問到是否搵王喜傾合作？何麗全驚訝地說：「嘩！你咁都知？」他不諱言王喜將要蟬過別枝：「快喇！等佢約滿咪得囉！」但不肯透露過檔酬金。此外，身為無綫花旦的陳法拉和胡杏兒均異口同聲表示，並沒有被其他公司挖角，強調錢並非續約最大因素。