謝安琪：嫁畀佢冇揀錯！

謝安琪（Kay）與老公張繼聰一直被指「女尊男卑」，Kay坦言不會以成就比較，更大讚對方是No.1好老公，愛錫家人兼重家庭觀念，難怪Kay強調冇嫁錯人。

老婆永遠是對的，但我從來唔會發火，佢結婚前係火滾少年，睇佢衣着就知啦！結婚之後佢變咗好多，我哋一直冇鬧過交，互相欣賞。媽咪當初覺得有造型嘅人好麻煩，後來識落覺得佢好孝順，成日都講屋企、父母同隻狗，都幾純品。相信媽咪鍾意佢有家庭觀念，呢種好男人依家好難求。

慶幸囝囝獨立

當初嫁畀佢冇揀錯！佢係一個好好嘅老公，因為佢父母好錫佢，有好多朋友，所以性格開朗。以前拍拖追求另一半有藝術氣質，佢音樂做得好，運動又叻，不過幽默先係No.1！我哋冇將成就攞出嚟秤，點解要去用世俗眼光論斷一個人？我唔Care呢啲講法。

有諗過再生BB，但培育一個人唔簡單。咁啱呢個BB好獨立，好有自己睇法，我咪好彩囉！如果佢黐身我又陪唔到佢，我會覺得做得唔好。難得佢同我性格同份工咁夾，我唔想打破咁完美嘅局面。

嗰陣都唔知老公紋身，見佢流好多血用保鮮紙包住隻手我好嬲，平時撞損少少就講到好大件事，咁傷害自己嘅嘢就咪搞啦！但當知道佢將阿仔同我個名紋埋一齊，我突然好明白佢份心意，咁痛都整，仲要係一生一世，真係好大嘅愛，好感動。（全文完）

後記：5年洗禮大變

筆者可說是看着Kay在圈中成長，初出道的她較為慢熱，問一句、答一句，但經過五年的洗禮，Kay變得成熟、健談，今次更足足做了三小時訪問，她全程放開懷抱，有求必應，而當問到一些平日不想多談的敏感話題時，她都帶笑回答盡量滿足筆者，令整個訪問都很舒服。

口述：謝安琪

筆錄：音樂組