靚靚御夫有術唔「惡」頂

事業起跌最終順利過渡，袁詠儀轉往人生另一階段，成為張智霖太太，但卻長期擔演「惡妻」角色！她自爆劉嘉玲教曉她御夫術，也樂得繼續做「惡妻」！

口述：袁詠儀　筆錄：影視祖

攞完影后後事業轉向平淡，最初接受唔到，咁啱96、97年電影市道唔好，搵我嘅電影好多只係拍7至10日，連對手都未摸熟就拍完，拍拍吓都唔知自己為乜，有諗過係我唔啱娛樂圈，定係娛樂圈唔啱我呢？當時有朋友叫我去旅行休息吓，結果玩足一年。轉到經理人公司嘉禾後，佢哋幫我接咗部內地電視劇《花木蘭》，最初好唔習慣內地生活，覺得好討厭，後來見到工作人員咁凍都仲係用心做，自己醒覺就搵番樂趣。就係用咗「阿Q」精神嚟過渡呢個階段，我亦知道花無百日紅。

驚「小三」埋身

依家結咗婚生咗仔，好享受呢個階段，有次吳君如問我唔再想喺事業上進取啲咩？哈哈……我最大嘅願望係做少奶奶！其實都想再衝，但要有取捨，唔畀見阿仔半年，我未必會拍，我好享受同個仔相處嘅時間，想同佢有好多共同回憶。

同張智霖一齊咁多年，畀人話我係「野蠻女友」到「惡妻」，初初唔接受o架！心諗「好惡咩」，但冇所謂啦！至少冇人敢埋嚟借錢，哈哈哈！雖然我老公係正，但我唔正咩？我老公都話我有市場o架！邊個女人唔怕人搶你老公o架！但驚係冇意思，要做好自己，我安於企喺佢側邊，等佢去衝、去照顧家庭。做妻子或媽咪角色，事業可以有，但唔需要咁「行」，做好崗位佢就唔會走，我唔會鎖住佢。劉嘉玲教我男人唔好箍得咁緊，放吓佢，放到咁上下，佢會問點解放咗我嘅？咁就會自己返番嚟，畀佢安穩生活、舒適屋企，等佢珍惜呢個家庭就得。（明日待續）