袁詠儀不和女王懶得自辯

袁詠儀（靚靚）當年年少氣盛，可謂不知天高地厚，結果屢傳與對手不和，包括周星馳和劉嘉玲等，但她從來懶得澄清：「費事去辯護，辯護就變咗幫自己解釋咁。」

當年同周星馳拍《國產凌凌漆》時傳我哋不和，話因為我不滿佢冇劇本喎！都唔知邊度寫出嚟嘅，嗰陣時啲人話要星仔「萬歲」好難，但佢試過大拿拿攞二千蚊出嚟打冷喎！我真係完全Feel唔到我哋有唔啱囉！

啲人話我因為攞咗影后就嫌佢冇劇本，其實我唔介意冇劇本，我最鍾意古靈精怪，拍《金枝玉葉》都係邊拍邊諗古靈精怪嘢；拍《國產凌凌漆》時根本冇在意有冇劇本，反而係諗星仔今日會點呢？係好有火花嗰隻，我哋亦會傾偈，又一齊捉住個美術指導嚟整蠱，如果真係不和就唔會同我玩啦！

我同星仔溝通到o架！嗰陣有人話搞電影以外嘅某啲生意，星仔即刻走去約佢同埋我一齊傾生意，但係呢啲我唔需要講畀人聽，都費事去辯護，辯護就變咗幫自己解釋咁，最緊要係我同星仔冇嘢啫！

拍戲免深交

其實我喺圈中有好多朋友o架！不過啲人唔會寫之嘛！好似話我同劉嘉玲不和，我哋拍《一江春水向東流》幾個月都只得一場戲，唔知點解會傳不和，後來拍《富貴門》又話同郭可盈、呂良偉不和，唉！都費事講。所以呢啲是非令到我拍戲時唔會深交，一深交就煩，我識做嘻嘻哈哈過一世，已經驚咗，萬一好傾啲嘅，有一日冇乜嘢傾又話我哋不和，太煩喇！我以前火爆性格易得罪人，依家有事會行開抖啖大氣，當自己時運高聽唔到、睇唔到，我知咁樣係唔好，咪返屋企對住老公係咁講，但日後若果真有是非，就會覺得自己做得好叻。

（明日待續）

口述：袁詠儀

筆錄：影視組