央視焗咪嘴祖兒冇聲出

譚詠麟與容祖兒等兩岸三地歌手前晚出席央視中秋晚會，內地雖嚴打假唱，但有網民懷疑有歌手「咪嘴」！兩人昨日直認其事，慨嘆「身不由己」，應大會要求才「咪嘴」！

譚詠麟（阿倫）、容祖兒、余文樂、林子祥、甄妮、黃家強、張衞健、范瑋琪與那英等兩岸三地歌手前晚齊集江門，盛裝出席央視的中秋晚會，星光熠熠！雖然內地近年立法嚴打假唱行為，但有網民發現晚會中有歌手懷疑「咪嘴」演出，獻唱時完全對不上口形，更有網友揶揄歌手要「咪嘴」，也應該要專業。

呻難過唱現場

有份參演的阿倫，昨日與鄭裕玲（DoDo）接受電台訪問時被問到「咪嘴」事件，他即慨嘆「身不由己」：「我已經將有需要嘅嘢帶去現場，但仲係被要求唱MMM（夾嘴形）！其實你叫我MMM仲難，唱到個心卜卜跳。」在旁的DoDo即問：「你有冇要求唱現場？」阿倫無奈續說：「冇得要求！呢個中秋晚會係中央電視台兩大騷之一，個騷係全國播放，不容有失，其實呢啲好小事。」對於內地曾表示嚴打「咪嘴」假唱行為，阿倫則說：「呢個可能係Special Case！國家級節目有唔同處理方法，我哋要入鄉隨俗。」至於網民投訴有歌手演出時，夾口形也夾甩嘴，阿倫自讚「唱得準」：「我有睇番自己，但冇睇其他人。」

另一參演歌手祖兒的經理人霍汶希，昨日亦承認有其事：「祖兒係應有關方面要求『咪嘴』，因為大型晚會係全國播放，不容有失，作出呢個安排都情有可原，尊重每個台及每個單位，順從大會要求。不過，祖兒都覺得『咪嘴』難過唱Live（現場），因為外來因素有乜改變就會易甩嘴。」

內地第二大騷

據悉，中秋晚會與春節晚會是內地兩個最重視的大型活動，據知舉行晚會前一晚會預先錄影，並當作真正演出。

此外，DoDo重提32年前獻給阿倫的螢幕初吻，而非合作無間的周潤發，笑言已忘記當時的感覺，但阿倫則賣口乖讚「好冧」。記者取笑阿倫拍MV時艷福不淺，他笑說：「我為藝術犧牲，MV係導演心聲，交由我表達，我都好辛苦。最難忘一次係同林鳳嬌咀，當時佢未結婚，成龍仲追緊佢，成龍叫我幫手講幾句好話，佢仲離遠踎喺度(目及)我哋拍戲。」