抱34磅蝦餃仔 陳慧琳Chok傷頸

潮媽陳慧琳（Kelly）每朝湊愛兒蝦餃仔返Playgroup，她透露蝦餃仔重34磅，不夠力抱他！談到育兒之道，她表示為了愛兒着想，要學會忍心。

潮媽Kelly昨日到香港仔一間老人中心探訪，跟長者玩遊戲、唱歌兼大派月餅。今年中秋節翌日是其生日，她表示會留在家中跟家人共度，又透露蝦餃仔劉昇很愛食月餅：

「佢成舊攞嚟食！我一向唔畀甜嘢佢食，因為佢未識刷牙，又未睇得牙醫，我怕佢蛀牙，但大時大節就畀少少佢食啦！」

蝦餃仔剛上Playgroup，Kelly表示他慢慢適應中：「佢間唔中都扭吓計，但冇勁喊，老師話媽咪走咗，佢哋就唔喊。其他家長教我要忍心，為佢好我都要忍心。」她每朝親自送蝦餃仔返學，但受到傳媒追訪，故麻煩到學校讓她使用特別通道，令她不好意思。她又大爆蝦餃仔重34磅，不夠力抱他：「我試過扭親Chok傷頸，又驚跌佢落地，所以畀工人抱。」

想上電視唱歌

提到陳志雲涉貪案無罪釋放，Kelly戥對方高興，對於陳總為四大唱片跟無綫版稅問題尋求解決方法，她說：「我都希望快啲破冰，依家雙方都冇得益，我好耐冇上電視唱歌，好悶好想唱吓歌！」