王喜寸爆樂易玲：等緊佢電話！

陳志雲昨日正式復工，但其好友王喜則是最後一日為無綫効力！昨晨王喜拍攝節目《香港演義》外景，有指志雲脫罪後，樂易玲即轉軚指有適合工作會找他，王喜即寸爆說：「好呀！我等緊佢電話！大家唔好叫人樂小姐，應該係陳太，人哋生咗兩個啦！咪叫到人哋好似未嫁咁！」其後他又透過微博叫大家不要再逼樂易玲撒謊，指老練的她該言論計算精準，他寫道：「我離約滿都不夠一個月，還能等到嗎？」

對於王喜的言論，樂易玲表示不欲回應，以免像罵戰，但她卻道出實際情況：「無綫有本身嘅制度，每個藝人嘅合約都要由製作部總監級開會商討，唔係我一個人或陳生可以決定一切，我藝員部係會將藝人情況講出嚟，王喜嘅個案都討論過，最終結果係將來有適合就會合作，呢方面我毋須要講大話，我覺得王喜佢諗多咗！」

其實王喜與樂易玲交惡始於《烈火雄心》第三集時，王喜被樂易玲在電台訪問中指「好難搞」而結怨。此外，王喜透露在「志雲案」後，在《天天天晴》中原定八十集演出被刪至八十句對白都冇，他承認對這間電視台已不再留戀。