祖兒移平「小波地」攬胸肌王

早前性感出「峰」頭的容祖兒，近日重現「飛機場」身形，從後攬仔亦毫無顧忌！她笑言唔恨有「小波地」，若瘦到穿得下童裝就更好！

成功收身的容祖兒，前晚以性感貼身裝束錄影《2011勁歌金曲優秀選第二回》，大騷「飛機場」身形，同場還有古巨基、官恩娜、鍾舒漫及張智霖等。期間，擔任主持的「巨聲2」新人、有「胸肌王」之稱的陳國峰頻頻食螺絲，站在身後的祖兒突然從後攬實他，更伸手為他掃心口定驚，令陳國峰一臉尷尬！

掃心口非抽水

問到是否因沒有身材顧慮而大方「攬仔」，祖兒笑說：「我畀啲定心丸佢食咋！抽水嘅嘢諗都冇諗過！（你咁熱情，佢可能仲驚喎？）我純粹出於好心，拍吓佢心口啫！」對於「飛機場」再現，祖兒竟相當滿意，她說：「日日做運動嘛！『小波地』我唔恨，要有都好易，但我唔想撐大件衫，我好恨着童裝，覺得童裝好靚。」

至於因勇救媽咪而受傷的官恩娜，戴上手套遮掩傷勢，她表示受傷後最辛苦是沖涼及洗頭，問到有否叫男友幫忙，她說：「梗係冇，我唔准，好尷尬！」