栢芝憑歌寄意輸得起

張栢芝將再戰樂壇！最近正積極撰寫新歌歌詞，有指歌詞內容有「沒甚麼輸不起，曾經這麼這麼愛你」，全是她此刻的心情！

正忙於照顧愛子謝振軒（Lucas）返學的張栢芝，最近亦積極為事業打拚，籌備新歌再戰樂壇！東方衞視舞林大會官方微博昨日公布，栢芝將於本月8日到上海擔任嘉賓，並會首度獻唱新歌《曾經》，歌詞由她一手包辦，表達當下的心情，有指歌詞有「沒甚麼輸不起，曾經這麼這麼愛你，曾經以為愛很容易……」據知歌詞還在修改中，最後版本仍有待分曉。

向來愛心爆棚的栢芝，昨日有內地消息指她早前於寧波拍攝《河東獅吼II》時，經常見到老婆婆在影城執空樽，影響拍攝進度，栢芝為了幫婆婆一把，每見到空樽就幫手執，結果執了200多個空樽，逗得婆婆笑笑口！另外，栢芝粉絲於微博上載與偶像互動的相片，栢芝更親自在相片旁「題字」寫註解，自稱大美人、有型及可愛，非常搞笑！至於昨日牛一的化妝師Rick Chin表示，還未收到栢芝的禮物：「佢送過十幾萬嘅手錶畀我，好細心！」最近他跟栢芝均簽了新亞洲娛樂，希望將來一齊開工。

四哥信做到朋友

另一邊廂，謝賢昨日擔任王賢誌主持的now節目嘉賓，問到可見過孫仔Lucas？他打趣地說：「我同佢哋唔係好熟！（霆鋒心情點？）佢心情好到不得了，我又唔係佢肚入面條蟲，不過佢見到我點敢心情唔好！（拉姑見完孫仔，心情好啲？）我同佢依家唔係咁熟，好耐冇見佢！以前就熟，過咗去唔太記得，我有老人癡呆！（有冇見過啲孫？）孫梗要見，唔講你哋知啫！博見報咪拉佢出嚟影！（有指栢芝冇帶Lucas返學？）你哋都Short Short哋，你如果係佢咁大個，會唔會知老竇老母嗌交呀！」

王賢誌則表示，節目中問到四哥跟栢芝現時的關係，四哥以「OK」來形容：「佢（四哥）覺得鋒芝好似佢同拉姑一樣，可以做番朋友！」