彭羚母女開學變四萬

近年全職湊女的前樂壇天后彭羚，昨日親自送細女林清返學，二人全程笑住任影，十分親切，但未見林清的同學仔陳奕迅愛女康堤蹤影。至於陳慧琳則為囝囝剪髮迎新學年！

彭羚（Cass）昨晨7時許送細女林清返學，雖然她以黑Look上陣兼戴着黑超，但全程笑容滿面，並與升讀小二的女兒手拖手大踏步。當她見到記者亦隨即說「早晨」打招呼，問到老公林海峰（Jan）是否要上班？她說：「係呀！返電台吖嘛！」記者前日在中環巧遇Jan，他亦大方企定定影相。同場還有名人何穎雯夫婦帶女返學。

未見康堤影蹤

昨日是該校的小一至小三開學日，所以12時半放學，Cass亦有湊女兒放學。不過昨日則未見陳奕迅（Eason）一家蹤影，Eason老婆於微博表示為了避免不必要的麻煩，不會到學校接送女兒康堤。而盧淑儀昨日繼續送大仔李立仁返學，不過記者仍不見同校鋒芝的寶貝仔謝振軒（Lucas）。

另外，陳慧琳（Kelly）前晚出席活動透露，兒子「蝦餃仔」劉昇已返學：「佢返Playgroup冇喊，有得玩就開心！（驚唔驚返咗學唔黐你？）有排啦！」她坦言已為囝囝被偷拍做定心理準備：「一定影梗佢！（幫佢剪頭髮？）有，老師叫我幫佢剪，都係剪咗少少！（有傳Lucas逃學？）大家影唔到佢啫！」