安祖蓮娜怒趕畢佬出街

荷里活情侶安祖蓮娜祖莉及畢彼特不時耍花槍，女方最近因不滿畢佬與新片女助手朝夕相對呷醋，更怒趕他出家門！

畢佬近日在蘇格蘭格拉斯哥拍喪屍片《World War Z》，女友安祖蓮娜移船就磡帶子女相伴，但她卻不滿畢佬在片場見女助手Lara Marsden多過見她，擔心兩人日久生情而醋意大發。知情人士說：「畢佬唔拍戲時花好多時間同Lara一齊，Lara照顧畢佬無微不至，對佢有求必應，未埋位時仲拎茶去佢架豪華休息車添！」不少片場人士都覺得兩人有「景轟」，不時竊竊私語，難怪安祖蓮娜大發雷霆。

據悉安祖蓮娜對畢佬和Lara的曖昧忍了數月，近日發現兩人仍很親密更無名火起，早前更對畢佬「問責」，嗌交之餘甚至將他推埋牆，又對他手指指，更怒喝「死開」趕他出街，威脅執包袱帶埋子女走佬。雖然事過境遷，但仍然面左左。

買馬氹子女

未知是否補飛，畢佬近日秘密買了一隻馬送給女友，又買了6隻蘇格蘭小馬給6名子女，並已送到他們的法國南部大宅。仍在拍戲的畢佬前晚到倫敦會合女友，並帶同子女吃日本菜，他在車內攬着柏斯，一副慈父本色。而安祖蓮娜下午則獨自湊子女到陶瓷店參加陶瓷班。此外，安祖蓮娜前夫比利卜科頓的女兒Amanda Brumfield，5月時被判殺害一名女嬰罪名成立，她申請重審被駁回，將於下月初宣判，可能被判入獄30年。