杏兒睇好男友「宗」極稱帝

胡杏兒與李思捷日前為新劇開工，對於緋聞男友黃宗澤獲睇好能奪視帝，杏兒亦不忘暗撐男友，但未想過一齊攞獎。她透露挾新片強勢出戰「威尼斯電影節」，衝出香港！

無綫花旦胡杏兒日前與李思捷到土瓜灣拍攝新劇《換樂無窮》（暫名），飾演夫婦的他倆態度親暱，除了撐枱腳吔麵外，杏兒還替思捷抹嘴及大嗌「老公」，無懼「男友」黃宗澤（Bosco）呷醋！她說：「我同思捷喺《秋香怒點唐伯虎》合作過，但今次係第一次演情侶，同佢合作好開心！」

怕煩拒公開戀情

對於被視為視后大熱，杏兒謙稱言之過早，反讚楊怡、陳法拉、徐子珊及鍾嘉欣均是好戲之人：「睇埋台慶劇《萬凰之王》嘅反應先知！（鍾嘉欣睇好你？）佢都好可愛！」提到兩屆視帝黎耀祥早前激讚Bosco有機憑《潛行狙擊》的「跛Co」爆冷，杏兒甜笑力撐：「佢做得幾好，但要睇埋結局先得，其實有祥仔讚好都係指標！（想一齊攞獎？）冇咁諗過喎！（曾志偉開兩部戲畀Bosco，你又進軍影壇？）嚟緊都會為新片參加「威尼斯電影節」，當見識吓！」並表示希望演「熟女」角色增進演技。

此外，對於不少明星公開戀情，杏兒說：「好多外國藝人拍拖結婚都公開，係香港娛樂圈太奇怪啫！其實唔想公開都係費事煩。（你同Bosco都係？）好多人都係，哈哈！」