朱晨麗許亦妮唔膚「錢」

今屆港姐終於擺脫「豬扒」污名，選出被譽為近年最索三甲，不過靚女自然多人追，冠軍朱晨麗和季軍許亦妮輪流被爆鍾意結識有錢仔。花邊新聞多多，兩人寧願自揭最醜一面，圖洗掉「拜金女」形象；而一直備受冷待的亞軍朱希敏，自知新聞太少，擔心一年後會人間蒸發！

冠軍朱晨麗唔會飛圈外男友

出爐港姐冠軍朱晨麗貌似當家花旦陳法拉，外形上佔盡優勢，她開心地表示出街有人認得：「有次同媽咪行街，啲人話記得我媽咪所以認得我，但冇所謂，佢哋有讚我靚女。」但總有人喜歡雞蛋裏挑骨頭，試過有人當面說她醜樣：「有人話我個鼻太細，可以再高啲，好多批評，但從來冇諗過整容，媽咪生我出嚟，畀乜我都接受。」

朱晨麗雖然非出生大富之家，但不愁三餐溫飽，十歲離開家鄉到上海讀書，十六歲有機會來港學跳芭蕾舞。她曾自爆剛來港時要租住板間房，並一直隱瞞家人，她解釋：「唔敢畀媽咪知，畀佢睇到一定好傷心，我諗佢寧願唔食都要留錢畀我，自己反而冇所謂，返去只係瞓覺，夠用OK。」說來有骨氣，但早前卻被踢爆靠黐男友「脫貧」，最近更豪住千萬豪宅，她急着解畫：「暫時係租……希望將來儲多啲錢可以買樓！從來冇問人借錢，用幾多使幾多全部靠自己，呢樣係媽咪教嘅。」

早前被本報踢爆與香港芭蕾舞團群舞領舞員古思宇拍拖，朱晨麗說：「好多人唔睇好我哋，覺得攞獎後一定會分手，但我係一個追求平凡嘅人，有自己想法，未必如大家所想。（男友係咪好有錢？）我哋都係普通人，佢有自己生活，當然唔想畀人騷擾，但我亦有同佢傾過，我好似走入咗另一個世界，佢一定要知我依家嘅世界係點。」

亞軍朱希敏低調恐人間蒸發

五呎九吋半高的朱希敏，參選期間沒有太多新聞，奪得亞軍令不少人大跌眼鏡，但她自信「高」人一等，台型十足，她笑說：「好多朋友同我講，我當晚表現得超有自信，話我好似雙眼識發光咁，可能因為我生得夠高，所以Sharp啲，亦有工作人員笑我鬼上身，綵排時已經唔似自己。」

朱希敏與朱晨麗同樣有選美經驗，前年參加多倫多華裔小姐，五強止步，其後被當地電視台睇中邀請擔任主持，但她卻對香港娛樂圈充滿憧憬，下決心來港參選港姐：「聽講香港機會多啲，嗰邊華人有限，Market相對細，嚟香港碰碰運氣。」要在娛樂圈站穩陣腳，不少初生之犢都會靠是非、騷身材上位，朱希敏明知這個道理，卻擔心力不從心，她無奈地說：「我知道做呢行宣傳唔夠唔係一件好事，有朋友同我講：『你再咁低調，人哋好快唔記得你，你新聞唔夠多呀！』我會好好三思一下！」

朱希敏最大優勢是高度，但同樣成為隱憂，香港普遍男女較矮，她說：「返到嚟香港，成日聽見人話：『你好高呀！』行街都唔敢戴太陽眼鏡，以免畀人覺得我扮明星，唔想成日畀人望，自己都會避忌啲。」但她未有想過轉行做模特兒：「Model好講外表，成日要Keep住身材，到某個年紀就被迫停止，工作唔穩定，相對做藝人有更大發揮空間，最想同任達華合作。」

季軍許亦妮星途壓力大到喊

講到緋聞，季軍許亦妮可說是由頭帶到尾，被戲言有N咁多個男朋友，她沒好氣說：「我拍過三、四次拖，唔係大家所諗經常『換畫』，十幾個裏面只有三個係真，其他純粹朋友。」她強調不是一個隨便女仔：「我好難追o架！要有感覺先得，唔係講錢。以前男朋友會用好瘋狂嘅追求方法，每次最失意嘅時候，都有人喺身邊，或者帶我去啲好難忘嘅地方，畀我感受到對方真心。」

身邊經常有小蜜蜂圍住，但許亦妮自認非天生麗質，小時候肥得可怕：「小學有成百三、四磅，去到外國再肥啲，好得人驚！後來見到雜誌啲女仔好靚，希望可以變到同佢哋一樣，決心節食同做運動減肥，十四歲成功咗，返嚟香港放暑假仲畀星探發掘。」醜小鴨變天鵝，人生路亦改變，成為夜場活躍分子，經朋友介紹認識何超蓮等千金小姐，但她否認是拜金主義者：「相對佢哋，我算係比較慳，外國返學我都係坐巴士或者行路，當然香港夜晚出街較危險，好多時選擇坐的士。」

參選期間，許亦妮有大堆爆料新聞，令知名度大增，同時為她造成困擾：「當時心情好低落，每朝報紙出街會扎醒，擔心有唔好新聞，試過喺屋企人面前喊，壓力好大。」雖然已漸漸習慣，但仍未決定會否長留娛樂圈發展，她說：「會用任期內嘅一年，摸索吓係咪適合喺娛樂圈發展。」