陳奕迅怨霆鋒霸住C1

陳奕迅（Eason）昨日出席活動時，被問到謝霆鋒與張栢芝宣布離婚，他笑言與霆鋒其實很少接觸，但對方霸佔了所有娛樂版頭版，浪費了他努力爭取上C1的心機！

昨日Eason一身Dior Homme打扮，以青年大使身份出席領賢慈善基金的成立典禮。同場的李家誠匆匆入場，問到兒子如何？他說：「幾好。」逗留一會兒後由秘道離開。而Eason與兩位小鋼琴家楊雋和李欣潼Jam歌：「佢哋好勁，彈奏得好精彩，係第一次為我伴奏。我喺音樂方面負責推廣，我冇嘢叻，最叻宣傳。」他稱女兒康堤有學鋼琴，更為其新錄的國語大碟彈奏一曲：「彈得叻唔叻唔緊要，最緊要係佢有呢個經歷同回憶。（囡囡有天分？）有，OK o架！但同我一樣心散啲。（佢知係出碟？）佢知，我叫佢練多啲，或者第時有機會一齊演出都唔定，但最重要唔影響到佢學業。」

誠邀王菲做嘉賓

問到鋒芝宣布離婚，有否安慰霆鋒？Eason說：「好少接觸，下次叫佢『單聲』，霸晒啲版位，嘥晒我啲心機，我好努力爭取上C1 o架嘛！（打畀佢？）唔使喇！佢乜都好。（知鋒芝點處理離婚？）律師會清楚啲，我好少見啲內地人（指霆鋒）。」有傳下月開個唱的他將邀王菲任嘉賓？他說：「未Firm，會用誠意打動佢。（有特別表演？）請到佢咪特別囉！（請霆鋒？）請佢做咩？請佢嚟打功夫？佢咁耐冇唱歌，驚佢唔係咁熟，請佢嚟耍詠春啦！」另外，他在微博上載挽手袋扮老婆的相。