傅穎放唔低謙仔一團糟

羅仲謙與傅穎分手鬧劇上演至昨日，5日內3度開記者會，昨日首度前後腳亮相為事件道歉！女方以「好難釋懷嘅傷心事」來形容舊情，男方則身穿印有Chaotic（亂糟糟）字樣的Tee，多番澄清傳聞！

傅穎（Theresa）與羅仲謙（謙仔）昨日前後腳返星皓公司準備開記者會，由踏入公司到離開，一對分手舊情人刻意避開碰面，先是被安排在不同房間等候，記者會4時舉行，由Theresa先入場發言，離開後謙仔才露面，最後由公司高層陳小姐作補充。據知Theresa主動提出開記者會，而謙仔亦想藉機道歉。

落車左腳見瘀傷

自爆復合兼分手、被騙感情又被虐打的Theresa，在姊姊傅娜陪同下亮相，5分鐘的發言不設答問。她表示已就與謙仔的事情向公司、家人及朋友交代：「呢件事令到好多錫我嘅人好難過，特別係我屋企人，媽咪見到我傷勢好難過，我覺得係心痛，好對佢哋唔住！」說至此處語帶嗚咽，她承認由分手、復合到爆料事前沒有通知公司：「分手嗰日發生咁大件事，佢哋都唔知道，我當時冇開口，係唔想佢哋擔心，驚影響屋企人！我同佢之間嘅感情，對我嚟講係好難令人釋懷嘅傷心事，呢個係好沉重嘅包袱！」

Theresa揚言想在赴北京前將包袱放下，但講了整件事後卻令公司很麻煩，承諾以後發生任何事都會跟公司商量，並向同事及傳媒道歉，希望以後過新生活，專注工作。至於昨日有新一批受傷照曝光，見她屁股有瘀傷、大髀鬆弛及有橙皮紋！問到傷患是否已復原？她輕輕地「唔」了聲點頭，至於接受訪問有否知會公司？她則不作回答便離開。離開公司後，她在姊姊陪同下登上7人車直駛土瓜灣寓所，落車一刻，左腳乍見輕微瘀傷。

否認毆女踏幾船

跟着出現的謙仔，身穿Chaotic字樣（意指：亂糟糟）的Tee，分別向公司、傳媒及家人致歉，然後開腔談及與Theresa的一段情：「我同傅穎一齊嘅時候，有開心、有鬧交，但真係唔想攞啲細節公開出嚟，討論邊個啱、邊個錯！無論點樣爭執嘅情況下，我令到傅穎身體受到傷害都係我唔啱！我喺度向傅穎道歉，但係我否認有痛毆傅穎，我冇一腳踏四船！」

及至被記者追問Theresa身上的傷勢、覺不覺得事件令形象受損？謙仔一概沒有正面作答，只是多次嘆氣！問到與北京女友的關係？他說：「人哋已經開始新嘅生活，有新嘅男朋友，我哋已經分開咗！」至於日後會否再和Theresa合作？他表示交由公司安排。及至講到被封「賤男」、「溝女王」，他木無表情，記者會亦匆匆結束。