陳豪Aimee 同居包解畫

「黃金筍盤」陳豪與緋聞女友陳茵媺（Aimee），被本報踢爆已昇華至半同居，並於深井「行宮」短敍。前晚通宵「蜜」會後，陳豪昨晨以街坊裝離開，被撞破時只懂尷尬傻笑，更愈講愈亂。事後他與女友夾完口供，齊聲推麥包出來過橋。

同住將軍澳的陳豪與Aimee，因各自的住址早已曝光，為方便約會，陳豪兩、三個月前另覓「行宮」，租住深井碧堤半島，為保持戀情低調，雙陳不會同一時間出入，陳豪更會將座駕停泊在隔籬屋苑的掘頭巷，再步行往「行宮」，而Aimee則享用月租車位。

本報記者連日來在「豪」宅守候，前晚陳豪通宵與Aimee密會後，至昨晨7時才離開。一身街坊打扮，手持眼鏡盒及住戶證的陳豪步往取車。起初他戴口罩兼耷低頭，相當謹慎，其後放下戒心除口罩，但發現記者時，即一臉愕然。

問到是否與Aimee公開關係？是否另建「行宮」？他全程尷尬傻笑，沒有回應，更風騷揮手駕車離開。事後他接受本報記者電話訪問，心情靚絕，但卻愈答愈亂，更擺麥長青（麥包）上枱，十分搞笑。

辯稱沒有住戶證

記：記者　豪：陳豪

記：係咪同陳茵媺同居？

豪：（語調開心）唔係呀、唔係呀，去朋友屋企食飯。

記：邊個朋友？

豪：麥包。

記：點解清晨先攞車走？

豪：之前一晚食完飯飲咗酒，費事揸車，所以七點幾先攞車。

記：同Aimee一齊住深井？

豪：唔係呀，我住將軍澳。

記：關係已經昇華？

豪：（沒正面回答）呢件係開心事。

記：同Aimee乜嘢關係？

豪：保持約會關係。

記：唔公開？外界對你哋戀情受落。

豪：多謝大家。等我同佢約會多幾次先啦！

記：（再三追問）同Aimee搬咗去深井住？

豪：（開始亂）唔係，不過嗰度環境幾靚。

記：唔係喎！你攞住住戶證？

豪：（語窒）吓？點會呀，嗰張係我將軍澳住戶證。

記：將軍澳嗰個屋苑出入係用八達通喎？

豪：（繼續兜）吓……嗰張係八達通。

記：（有相為證）肯定唔係！

豪：係呀……唔信下次我畀你睇。

記：咁去深井做乜？

豪：幾次都係去麥包屋企食飯，阿嫂（麥太）手勢幾好，湯餸都好味。（叫Aimee學？）冇，總之我哋大家都有口福。

記：點解去人哋屋企食飯，但泊車泊咁遠？

豪：（再兜）費事同Aimee泊同一個停車場畀人捉到，點知都畀你哋捉到，我好低調，唔想畀人講咁多，總之我公開的話，一定會同《太陽報》講！（拖手畀我哋影？）好啦！好啦！

再合作奉旨談情

至於「豪嫂」陳茵媺接受電話訪問時，則表示因工作關係，未有留意報道，問到是否在深井築愛巢，她與陳豪口徑一致，只甜笑否認：「哈哈哈，我仲住清水灣，有朋友住喺嗰度（碧堤半島），上去食飯。（麥包？）係呀，阿哥呀，我哋上去食飯。（依家（指陳豪）係正式男友？）我都希望將來會係嘅。」

另外，「雙陳戀」因拍劇集《心戰》而撻着，據悉二人稍後接拍李添勝新劇《天梯》，屆時可攞正牌「寓拍劇於談情」。至於陳豪舊愛廖碧兒則懶理「雙陳戀」，昨日在微博只談工作：「返TVB為俄羅斯節目Dubbing（配音），記住睇呀！」

Profile

陳豪（Moses）

年齡：40歲

簡歷：07年憑劇集《溏心風暴》奪得無綫萬千星輝頒獎典禮最佳男主角，曾參與多部高收視劇集《金枝慾孽》、《溏心風暴》、《宮心計》及《公主嫁到》。

陳茵媺（Aimee）

年齡：30歲

簡歷：06年《香港小姐》冠軍，曾參與劇集《烈火雄心3》、《天天天晴》、《讀心神探》及《真相》等。