王祖藍倒吊嚟咀險甩褲

王祖藍與女友李亞男前晚在「演嘢會」公然談情，他更吊上半空施展「巴黎鐵塔反轉再反轉」啜啜女友，但落地時差點甩褲！

搞笑能手王祖藍的《王祖藍咪咁扮嘢演嘢會2》前晚在伊館舉行首場，祖藍施展扮嘢本色，除了「畫上」六舊腹肌扮港男擒鋼架外，又獻唱惡搞版《唸你》冧女Fans，但反應仍不及女友李亞男出場時哄動。以王子公主Look合唱《美女與野獸》的二人，冧爆細訴相戀經過，亞男更深情望實男友說：「雖然外面好多靚仔，但還是覺得你最好！」其後即除衫扮「野人」熱舞，祖藍更吊威吔施展「巴黎鐵塔反轉再反轉」與女友咀嘴，可惜落地時險遭威吔勾甩褲，可謂老貓燒鬚！

此外，好兄弟阮兆祥、李思捷、林欣彤及楊思琦等專誠捧場，而好友陳美詩及謝天華則客串「重演」祖藍的初戀故事，天華更不時「攝位」谷劇，場面爆笑！

下月赴美見家長

完騷後，「藍男」繼續十指緊扣受訪及耍花槍，當祖藍笑言幸好「Timing啱」才不致甩褲時，亞男即冧爆搭訕：「同我哋一樣！」至於何時拉埋天窗，祖藍直指好想，但仍需「準外母」審批，並透露下月將飛赴美國見家長。