傅穎露營遇小鬼捉「謎」藏

農曆七月，相傳鬼門關大開，往荒山野嶺隨時「中招」！女歌手傅穎原來十歲時曾於荒野撞鬼，還不止一隻而是一班，齊齊玩捉「謎」藏，嚇到她事後連日發高燒，要找高人幫手才化險為夷！

充滿陽光氣息的傅穎（Theresa），想不到亦有靈異經歷，更曾大病一場！她憶述首次撞鬼是十歲左右，當時就讀小學五年級的她與十多位同學跟隨老師到荒山野嶺露營，她說：「大家一班人去到一片草地係咁跑，突然感覺到一陣風吹過身邊，之後就見到有幾個唔識嘅小朋友喺度踩單車，當時我仲未意會到同未識驚。（睇唔睇到樣？）矇查查囉！唔係好睇到樣，但個個都係白色身軀，冇乜留意個樣，佢哋玩得好開心，仲『咔咔聲』咁笑。」

「叫我唔好出聲」

離奇的是，原來身邊人是看不到的，Theresa說：「我仲拍拍身邊嘅女同學，問佢見唔見到好多小朋友踩單車，但佢反問我喺邊度！於是我指向睇到嘅地方，女同學就話我隻眼係咪有事，之後班小朋友就消失咗，到咗呢刻我先識驚！我即刻走去搵老師，將睇到嘅嘢全部話佢知，佢不停安慰我叫我唔好驚。」說到這時，Theresa坦言打冷震及起雞皮：「之後我就一直黐住老師身邊，到玩捉迷藏時，我又見到同一班小朋友圍住我哋！有啲跟住一啲同學後面一齊走嚟走去，嗰時我真係識驚仲即刻大叫，但冇人理我。我唔知係冇叫出聲，定係老師同同學都聽唔到我叫，反而係嗰班小朋友畀反應我，全部向住我做出『』嘅動作，嚇到我即刻喊，同感覺到全身標冷汗！」

嚇完即發高燒

說時遲那時快，老師走過來問Theresa發生何事，她記得一味只識嗌驚：「我話好驚！『佢哋』又嚟咗！老師問我係咪眼花同錯覺，我話真係見到一班小朋友，老師仲好幽默話係咪同學嚟。可能我被『佢哋』嚇到癡癡呆呆同面青口唇白，老師問我需唔需要睇醫生同返屋企，但唔記得答咗佢乜，只知道當晚同幾個老師一齊瞓，我仲瞓喺中間，兩個老師夾住我。第二日起身我就開始發燒，老師即刻打畀媽咪通知佢帶我睇醫生，睇咗成個星期都唔退燒，體溫時高時低好反常，醫生都唔知我咩事！媽咪之後問我食過啲乜，我估佢以為我食咗啲唔乾淨嘅嘢，所以一五一十同佢講我見到嘅嘢，佢聽到都呆一呆。」

眼見愛女出事，Theresa媽咪隨即找人幫手，Theresa說：「隔咗一日，媽咪就帶咗我去一個類似佛堂嘅地方，有個唔知係咪『師傅』嘅人對住我唸經，仲用右手拍咗我個頭幾下，之後喺我身邊行咗幾個圈，最後叫我媽咪唔使擔心，話我瞓醒一覺就冇事，第二日真係冇再發燒，依家諗起都好神奇！（師傅話你係咪鬼上身？）我哋冇問呀！」Theresa強調當日的畫面歷歷在目：「真係好記得，始終第一次見，最慘得我一個人見到嘛！真係唔想再提起，好恐怖。（相信有鬼神？）信呀！見過點會唔信？不過我相信你唔害佢，佢哋唔會搞你囉！」