增磅祖兒現微峰

容祖兒、古巨基、官恩娜、謝安琪及梁漢文等多位歌手出席新城音樂會，祖兒穿上低V裙配六吋半高踭鞋上陣，甚有睇頭！

祖兒前晚出席《新城20聲光綻放音樂會》前，穿上六吋半高踭鞋到髮廊，離開時卻與歌迷發生「意外」：「嗰時着住對鞋，條路又難行，諗住行埋先幫佢簽名，點知我仆一仆，一掌推開咗佢！好彩佢冇整親。」而穿上低V裙出席音樂會的她笑言，黐了一整卷膠紙防走光：「唔介意性感，平實嘅身形可以有活潑調皮嘅感覺。同埋之前肥咗，身材好咗，但好唔熟悉，要培養吓感情先！」她大爆大前晚於古巨基的生日會上，出盡全力希望令基仔及助手兼緋聞女友Lorraine錫錫，可惜最終事敗。

古巨基給Lorraine名分

同場的基仔被提到生日會與Lorraine合照的事，隨即被追問何時給對方一個名分？他竟說：「畀咗啦！佢係我『得力助手』囉！」他自言對結婚及生仔沒有計劃，家人催婚亦催到累，現時他會作出調整：「我諗開始要計劃工作同生活嘅平衡，最近意識到唔應該好似以前咁衝衝衝，但近期要諗演唱會先，過埋今年先開始諗人生平衡。」他表示暫時未有閃婚的念頭，問到是否一個會即興決定某些事的人？他直認：「都係，開心嘅事就會做！」