爛口Miss釣金龜金美倫籌錢隆胸

荷里活女星金美倫戴雅絲與舊愛Justin Timberlake合作校園笑片，將無稽、搞笑及性感共冶一爐，講述拜金Miss教書只為釣金龜，遇到家底豐厚的代課老師，搞出連場鬧劇！

金美倫在新片《MISS愛教壞》破格演繹冇品又爛口的女教師荷詩，不但無心教學，更大膽在上課期間呼呼大睡及飲醉酒！一心放長線釣大魚的她不屑體育教師（Jason Segel飾）追求，但遇見新代課富家公子男教師史葛（Justin Timberlake飾）即生滋貓入眼，扭盡六壬攻陷他，同時跟好老師艾美（Lucy Punch飾）爭仔，搞到學校立立亂！眼見富貴代課阿Sir的舊愛胸前偉大，金美倫即「做嘢」僭建，為籌錢隆胸而搏命催谷學生，逼一班莘莘學子拿高分為她爭取獎金，可謂離譜到極！

行為無恥唔內疚

金美倫坦言閱讀頭30頁劇本時覺得無力招架，絕無可能接這套戲，但之後又改變主意：「我漸漸鍾意呢個角色，毋須為做過嘅事道歉實在太正，呢個正係本片魅力所在！一般電影都以角色為之前嘅行為道歉作結，不過冇人肯承認真正嘅自己！」儘管壞Miss行為無恥，但她仍維護角色：「佢其實好痛苦！佢唔鍾意自己個世界都冇刻意隱瞞，對佢嚟講唔係笑話！」

親密場面零火花

就算與舊愛Justin合作，金美倫揚言絕不尷尬：「我哋好了解對方，友情同愛已經進化到一個可以恰當工作嘅層次！」二人還誓言要創出史上最騎呢的親熱場面，角色之間根本零火花，所以親熱時衣衫整齊，毫無默契兼恰如純粹摩擦皮膚！另外，Justin的粉絲亦將會一睹偶像以傻仔造型唱超爛情歌《Simpatico》，Chok樣加假音，殺死人！

金美倫搏到盡，導演Jake Kasdan亦讚她得心應手：「荷里活少有女演員可以似佢咁放，搞笑又索，實在難得！」服裝指導為迎合她似去蒲多過教書的扮靚形象，決定無論金美倫以甚麼造型出現，都一定要配對5吋高踭鞋。