朱紫嬈嚇鬼足球變人頭
樂壇實力派女歌手朱紫嬈（Khloe）最愛聽鬼古，經常和友人分享所見所聞的靈異事件，日前她接受訪問時，大談首次撞鬼的恐怖經歷。她表示讀中學時，和一班同學到長洲度假屋過暑假，雖然度假屋布置優雅，但卻令人渾身不自在。
Khloe稱當日一切安然，但晚上他們齊集客廳傾偈時，廁所頻頻傳來沖廁聲，門外又不時響起腳步聲，她說：「有大膽啲嘅同學去廁所同大門睇吓，結果係冇人囉，全部人都好驚。」其後，有同學在房中發現一個舊足球，有人將足球擲落枱，但足球竟變了人頭，她憶述：「唔知點解個波變咗人頭，我驚到大叫，其他同學睇到都一齊叫，全部走晒入房。」由於實在恐怖，Khloe一行多人漏夜執行李離開度假屋。
朱紫嬈憶述親身遇上的恐怖經歷時仍猶有餘悸。