蘇玉華要簽帳額定驚

早前出外進修的蘇玉華(阿蘇)回港後密密接Job搵銀,日前她獲邀接拍信用卡廣告,初嘗吊威吔滋味,雖然阿蘇初時未習慣而顯得有點吃力,但她仍毫無怨言繼續拍攝。

向來入得廚房的蘇玉華除拍劇外,工作都離不開食,但最近她跳出飲食框框。早前被廣告商睇中接拍信用卡廣告,她乘機大讚自己︰「因為我有信用,銀行先搵我拍,而且我一向畀人嘅印象都係開心,所以好配合呢次『開心卡』主題。」問到酬勞是否滿意?她說︰「梗係滿意啦!而且工作氣氛幾好,呢樣嘢係最重要。」

廣告中阿蘇要拍攝一個吊威吔鏡頭,起初被吊起時她似未準備好,立即叫停︰「未得,未準備好!」及後很快得心應手,並對着鏡頭做出多個表情及動作,更與工作人員及導演交流意見,完全克服吊威吔的恐懼。記者問她會否要求銀行送簽帳額「定驚」?她笑說︰「既然大家合作愉快,我相信佢哋會識做嘅!」

望多方面發展

此外,阿蘇透露最近嘗試做主持,她說︰「以前覺得做主持好難,要隨機應變同執生,覺得自己做唔到,不過做落發覺原來應付得嚟。」她坦言不想局限做主持及拍劇,希望嘗試不同類型的工作。

專案組

首次接拍信用卡廣告的阿蘇笑言要廣告商送出簽帳額作慰勞。

阿蘇被吊起拍攝廣告,起初有點不習慣。

阿蘇希望嘗試不同類型的工作,又透露將到柬埔寨作慈善探訪。