香車配美人 葉璇為好友搲折頭

一年內拍了十部作品的葉璇，無論外形及品味均予人高尚感覺；對Audi情有獨鍾的她，曾推薦身邊好友試揸。而同樣愛名車的導演麥兆輝，則揚言會豪擲近百萬慶祝新片票房報捷。

同是愛車之人的葉璇及導演麥兆輝（Alan），大前晚出席由汽車品牌Audi贊助的《竊聽風雲2》電影首映。非常女性化的葉璇，原來鍾情靚車，並對試揸過的Audi情有獨鍾，皆因用後感覺極「正」。對朋友素有義氣的葉璇，曾代言人上身推薦內地好友試用該車，更成功為好友爭取折頭，實在「唔話得」：「呢個品牌好好，之前我出席佢哋嘅新車發布會，個負責人知我朋友買Audi，即刻畀咗個折頭我。」

Alan則揚言對新片票房充滿信心，並笑言若能打破第一集的千五萬票房，會豪擲近百萬元購買Dream Car Audi A6。

吳彥祖半裸扮死屍

至於男主角劉青雲及吳彥祖，愛車絕對不輸美女葉璇；Alan指青雲15年前已對名車愛不釋手，在《竊》片中揸過Audi S5後，大讚該車性能好兼夠奢華；而本身是Audi車主的吳彥祖，為儲錢買靚車及養家瞓身搏到盡，在電影赤裸上半身扮死屍，更因此遭工作人員取笑，指他扮死屍都型過人，又艷羨其八塊腹肌：「我估唔到會喺毫無還擊能力之下任人觀賞。」