許廷鏗處男個唱玩凸出

樂壇新人許廷鏗（Alfred）前晚舉行處男演唱會，唱陳奕迅（Eason）的歌時更Chok樣上身，穿上緊身褲「激凸」人前，令台下女歌迷睇到o依嘩鬼叫。

巨聲幫Alfred一直深受歌迷愛戴，新碟推出反應熱烈，唱片公司前晚特別為他舉行處男個唱，無綫高層樂易玲專誠捧場，並在台上頒「金唱片」賀新碟大賣，更大讚：「其實你笑起嚟都幾甜。」令他一臉尷尬。而師姐妹鄭欣宜及吳若希先後上台打氣，加上其父母帶同親友捧場，令他唱到尾聲時忍不住流下男兒淚。

穿上窄身褲的Alfred不時夾腳，以致重要部位「激凸」。Alfred更懶理無綫跟「四大」的轇轕，在樂易玲面前選唱「四大」歌手之一Eason的歌，更大Chok甫士，令台下歡呼聲四起。

否認拍拖

事後，提到「激凸」之事，Alfred愕然地說：「吓？唔係嘛！條褲我平時着開o架！（條褲太緊？）可能係，我冇諗太多，只係投入唱歌。」提到唱Eason的歌會否怕敏感？他表示不擔心，並指大會都有叫他多唱Eason的歌。提到之前被拍到跟女同學拍拖，Alfred坦言二人並非拍拖，不過對方前晚亦有捧場。