唐寧孭「節瓜仔」出巡 冧暈師奶

三月誕下麟兒的唐寧，日前孭着囝囝出巡買餸。師奶仔Look現身的她於街市游走，BB不時露出與媽媽一樣的可愛笑容，冧得菜檔師奶激讚似樣！

產後逐步復出的唐寧，經過連月收身已成功減去數十磅，但日前身穿闊Tee、短褲加人字拖的她抱着兒子現身粉嶺街市，身形依然略見圓潤，更有點像師奶仔，幸好勝在童顏搭夠。懷中的BB則有一雙圓眼，與唐寧如出一轍，加上肉地十足的節瓜手及節瓜腳，可愛度爆燈，難怪吸引不少途人注目。

現場所見，唐寧流連蔬菜檔，細心挑選紅蘿蔔、番茄及節瓜，雖然只是簡單食材，但她依然細心地左挑右選，又不時放在手中量重量，可謂精打細算。經過約五分鐘「觀察」後，最終在其中一個檔攤扑錘買材料，但由於孭着巨B而「行動」不便，掏錢時顯得雞手鴨腳，花上好一陣子才成功找到。付款期間，菜檔師奶激讚BB精靈可愛，與唐寧甚有「母子相」，又肉緊地趨前氹BB。此時，BB突然發出「咿咿呀呀」的可愛聲音，還向菜檔師奶報以甜笑，逗得唐寧及菜檔師奶笑晒口，兩人再閒聊多幾句才離開。其後，唐寧往附近的寵物店買龜糧，但極速離開，前後逗留不足十分鐘！

怕熱急急走人

事後，記者致電唐寧，她笑言現時有空便帶兒子四處走，讓他多見世面：「我想佢多啲同陌生人相處，咁樣大個先冇咁怕醜。（咁快就閃？）BB好怕熱，平時食奶都食到成身汗！呢排天氣咁熱，我唔敢同佢喺街逗留太耐，驚熱親佢。」問到買大量蔬果是否還在減肥？她笑說：「紅蘿蔔係畀啲狗食o架！我想佢哋腸胃好啲。」