超雲為山聰討清白

賭王何鴻燊千金何超雲和陳山聰撻着愛火，成為城中熱話，可惜有指山聰被超雲包養，令何家千金真的憤怒了！對於這些流言蜚語，超雲昨日連珠炮發轟《壹週刊》報道失實，已發律師信聲討。

超雲貴為賭王三房長女，一直深得賭王疼錫，自她向本報首認與無綫藝人陳山聰拍拖後，被不少有心傳媒乘機穿鑿附會，除指她包養山聰外，更替山聰前妻墊支贍養費。

對於種種不利山聰傳聞，為維護愛郎，超雲終忍無可忍，昨晚出席活動時怒插有周刊老作，穿上「優勝者」背心的她霸氣十足，在半百記者簇擁下，氣定神閒，更有楊千嬅公關老公丁子高全程傍實，明顯有備而來。現場有記者大聲呼喚「陳太」，超雲聽後即顯得有點忟憎，並說：「尊重啲唔該！」

記者：記　超雲：雲

記：公開後心情點？

雲：幾開心，但有樣嘢想講，今日（昨日）有周刊出咗不實報道，已經叫律師出律師信聲討佢誹謗，如果再出失實報道，會再發律師信追究。

記：邊本周刊不實？

雲：《壹週刊》！

記：具體啲講，邊一部分失實？

雲：成篇都失實！唔想講，會交畀律師處理。

記：你幫山聰畀錢佢前妻？

雲：當然冇啦！我相信律師會處理。

完全冇錢銀轇轕

記：陽明山莊係你幫山聰租？有冇畀錢山聰？

雲：唔係！係佢自己租！我同佢完全冇錢銀轇轕。

記：你哋會結婚？

雲：唔好再講，會影響何家整個家族同我嘅聲譽。

記：今次旅行係你畀錢？

雲：唔係。

記：分開畀錢？

雲：我唔想再講，總之你哋祝福又好，唔祝福我哋又好，唔緊要，但唔好亂寫。

記：介意畀人話女尊男卑？

雲：當然介意，香港唔同傳媒雜誌，佢哋嘅手法都唔同，寫得太離譜接受唔到。

記：山聰唔開心？

雲：佢習慣咗，但係時候畀Warning。

記：山聰知你發律師信？

雲：佢都知。

記：山聰依家畀人話喎？

雲：一早已知，有啲人有受教育，有啲人冇，幫唔到佢哋。

公開戀情有壓力

記：你好大壓力？

雲：少少，但唔係太大，都OK！

記：屋企人反對？

雲：講最後一次，媽咪冇反對，佢一早知，爹哋就我哋去旅行前已經知，我同佢好好朋友，唔會唔同佢講。

記：爹哋鍾唔鍾意山聰？

雲：見佢幾OK，有同佢講笑。

記：賭王有冇安慰同支持你？

雲：佢叫我唔好理記者。

記：有冇教你點同佢相處？

雲：佢好放心。

記：媽咪（三太陳婉珍）大壓力？

雲：唔係好大，反而弟妹話我喺度，啲記者就跟住晒。

記：山聰大壓力？

雲：已經完晒呢啲壓力。

記：點解突然公開戀情？

雲：決定公開因為唔想有人亂寫，想畀真實事觀眾知！

記：山聰係咪為你唔開工？

雲：佢家人有事，之前都講咗佢嚟咗十日（指歐遊）就走。

記：你知山聰同前妻關係？

雲：我成件事都知，但唔太想講。

記：你知佢同前妻分開咗先一齊？

雲：係！

記：視佢結婚對象？

雲：唔好再講，我太細個，唔想諗，啱啱開始四個月，諗結婚好荒謬。

穩定唔代表結婚

記：咁又話好穩定所以公開？

雲：穩定公開唔代表要結婚。

記：山聰有畀錢前妻？

雲：唔知！好少傾呢啲問題。

離開時，超雲落樓梯Kick到，幸好沒有跌倒！九時半離開尖沙咀活動地點後，她由司機接載返回布力徑三太大宅。儘管連日來有不利傳聞針對山聰，但超雲一於少理，為撐情郎，繼續在微博晒恩愛！昨日凌晨，她上載與山聰的連體嬰合照，兩口子肩並肩、頭貼頭，笑容一致。超雲還寫道：「今天（前天）整天都在跟記者捉迷藏！終於還是躲回家了，送給今天辛苦的你們吧！（做鬼臉）」如此一來，似是慷慨地向記者交差！