天華送祝福 笑山聰「潛水」

「聰雲戀」關係浮面，曾與陳山聰合作的藝人及超雲的過氣緋聞男友，紛紛送上祝福。

黎耀祥：

之前喺電視台撞到佢（陳山聰），幾勤力，見過佢問艾威學做戲，佢拍拖都戥佢開心。年輕人係有浪漫情懷，但唔好犧牲所有嘢。佢依家「初戀」剛開始，穩定咗會有方向發展工作。

吳卓羲：

作為山聰朋友，會祝福同戥佢開心，希望大家畀空間佢哋，唔係搞到出街拍拖都唔夠膽，就冇意思啦！

葉翠翠：

戥佢（陳山聰）搵到自己鍾意嘅人高興，外界覺得高攀或者唔睇好，其實事實未必係咁，可能命中注定。

鍾嘉欣：

恭喜佢（陳山聰）！我冇佢電話，但同佢合作（曾合演《皆大歡喜》）好開心，知佢係好男仔，搵到着落，好戥佢開心！

謝天華：

遊埠幾個月唔使做，邊個唔想？仲有女伴添！作為朋友知道就開心。（羨慕？）畀我停工作太耐都會唔慣，最好一年做九個月休息三個月。（仲有同山聰聯絡？）微博有留意，不過聽講好多朋友都搵唔到佢。

張致恒：

幾好吖，我有Send短訊恭喜佢（超雲）。（你一早知？）嗯……點都好啦！總之朋友開心，點都支持。（睇好佢哋？）呢啲係佢兩個人嘅事，只要開心就得，唔會評論，佢依家幾開心吖，唔使煩成日回應咁多嘢！