William 喊冤 冇掂阿嬌

Twins成員蔡卓妍（阿Sa）前晚與男友陳偉霆（William）同台出席頒獎禮，怎料有鍾欣桐（阿嬌）Fans炮轟William於放煙花時，為保護女友而推開阿嬌，事後William澄清：「我冇推過人。」

前晚William與女友阿Sa齊齊出席《新城國語力頒獎禮》，阿Sa與好姊妹鍾欣桐（阿嬌）當選全國最受歡迎組合及奪得歌曲獎，成績驕人！頒獎禮開始時，全體歌手上台大合照，阿Sa與William隔着阿嬌仍挨後密密傾。期間，舞台爆出煙花效果，歌手紛紛嚇得退後一步，怎料有阿嬌Fans事後在微博炮轟William，指爆煙花一刻，William為保護女友而一手推開阿嬌，行為過分！

記者昨日致電William，他堅決否認曾推開阿嬌：「我係驚有意外，下意識用手去擋，當我發現佢哋冇事，已經即時縮手，我冇推到人，亦冇掂到人！」而阿嬌亦在電話中為William澄清：「佢冇掂到我，我諗係角度問題先惹大家錯覺，佢唔係只錫阿Sa，佢都好錫我！」

阿Sa突避談男友

雖然William錫到阿Sa燶，但昨日為唱片店剪綵時，阿Sa卻突然不欲多談男友。當問到是否愛與William齊齊「煲碟」時，阿Sa不悅地說：「點解成日提佢？（佢尋晚話做完嘢同你撐枱腳？）唔好講呢啲！」其後她承認撐了一晚枱腳，問到為何突然避談男友，她說：「日日都問，唔想講！」阿嬌即代為解圍：「唔該理吓我感受，我成日企喺度冇嘢講！」

此外，頒獎禮上，台灣男子組合LOLLIPOP F落台獻花時，成員敖犬將紅玫瑰送給阿嬌與阿Sa，事後他笑說：「我也害怕送花給阿Sa會導致他們吵架！所以，我不敢和William有眼神接觸。」