珍妮花保持Good弗隨時剝衫
荷里活女星珍妮花安妮絲頓入行多年，一直保持身形Good Fit，她除了為健康着想外，更笑言為拍「清涼」鏡頭作好準備：「保持體態，就唔驚拍嗰啲場面啦！」
記：記者 珍：珍妮花
記：你遇過難頂嘅波士嗎？
珍：我曾經遇過一個很難捉摸、有啲複雜嘅波士，不過未算難頂！
記：你喺《邊個波士唔抵死？》演出一個經常開黃腔嘅角色，之前有冇顧慮？時下靚女都愛開黃腔？
珍：我完全冇顧慮！當我知道編劇寫劇本時以我為藍本，我感到係一種讚美！
記：導演Seth Gordon有冇鼓勵你即興演出？
珍：冇喎！全部都係根據劇本做。對我嚟講，即興演出係當攝影機開始拍攝，而演員唔知自己做緊咩，只係浪費人哋嘅時間同金錢，今次冇發生呢樣嘢。我只係做我嘅工作，一切都喺導演操縱之內！愈大膽愈好，咁真係好易做，真o架！
騎住拍檔勁尷尬
記：由一個女人演一個好典型男人嘅角色，係咪好好玩？你點準備角色？
珍：呢個係我覺得好玩嘅原因，以女人身份，去做一個一般嚟講由男人演出嘅角色，令到套戲好玩好多！拍攝前，我去咗睇牙醫，留意佢哋點樣拎工具，其餘部分都好容易！
記：你飾演呢個角色時，以咩人作為靈感？
珍：噢，奇雲史柏西……唔係，我冇遇過任何似我角色嘅人，所以基本上我係運用想像力，探索自己嘅陰暗面，睇吓得到啲咩。
記：邊一場令你最尷尬？
珍：我同飾演下屬嘅Charlie Day只係啱啱認識，第二日就要騎上佢身色誘佢！我為自己感到尷尬，希望佢原諒我啦！
記：你喺片中經常着內衣，有冇特別去健身？
珍：其實我一向有定期健身，當你保持健康嘅身體，就唔會驚拍嗰啲場面囉！將身形一直維持喺良好狀態，咁就唔使要突然瘋狂收身！
懶理影評亂攻擊
記：你點睇成名作《老友記》嘅角色Rachel？你啲粉絲有冇唔鍾意你轉變乖乖女形象？
珍：我好鍾意嗰個角色，演出好好玩！依家仲有啲粉絲會叫我Rachel，冇人因為轉變而唔高興喎！
記：你會唔會介意影評人對你嘅評價？
珍：唔會，佢哋成日改變立場。今時今日嘅影評人，好似比較喜歡人身攻擊，而唔係實際上對演出作善意批評。
記：你拍完呢部戲後，係咪會暫休一輪？會做啲咩呢？
珍：係呀！不過我做乜要話畀你知？我就係想休息，但唔計劃自己會做啲咩，呢個就係好玩嘅地方，或者我會旅行，感受吓生活！